കോഴിക്കോട്: പ്രമുഖ ജീവകാരുണ്യ പ്രവർത്തകനും ആകാശവാണി ഗസ്റ്റ് ആർട്ടിസ്റ്റുമായ അശോകൻ ആലപ്രത്ത് അന്തരിച്ചു. 55 വയസായിരുന്നു. ഹൃദയാഘാതത്തെ തുടർന്ന് ചൊവ്വാഴ്ച പുലർച്ചെ 3ന് സ്വകാര്യ ആശുപത്രിയിലായിരുന്നു അന്ത്യം.
ഏറെ ജനപ്രീതിയാർജിച്ച, സമകാലിക വിഷയങ്ങളെ അപഗ്രഥിക്കുന്ന പ്രതിദിന പരിപാടിയായ ‘ശ്രദ്ധ’യുടെ അവതാരകനായിരുന്നു അദ്ദേഹം. ഇതുകൂടാതെ ധാരാളം പരിപാടികൾ അദ്ദേഹം ചെയ്തിട്ടുണ്ട്.
കേരള ബ്ലഡ് ഡോണേഴ്സ് ഫോറം കോഴിക്കോട് ജില്ലാ പ്രസിഡണ്ടും ജയന്റ്സ് ഇന്റർനാഷണൽ ഫെഡറേഷൻ-4 വൈസ് പ്രസിഡണ്ടും ആയിരുന്നു. കോഴിക്കോടിന്റെ സന്നദ്ധ, സൗഹൃദ കൂട്ടായ്മകളിലെ സ്ഥിര സാന്നിദ്ധ്യമായിരുന്നു അശോകൻ ആലപ്രത്ത്. അദ്ധ്യാപകൻ, പ്രഭാഷകൻ എന്നീ നിലകളിലും പ്രവർത്തിച്ചിട്ടുണ്ട്. പരസ്യ നിർമ്മാണ രംഗത്തും ശ്രദ്ധ കേന്ദ്രീകരിച്ചിരുന്നു.
രക്തദാന രംഗത്ത് സജീവമായിരുന്ന അദ്ദേഹം ഒരുപാട് രോഗികളുടെ ആശ്രയമായിരുന്നു. കോഴിക്കോട് ടൗണിലെ സൂപ്പർ സ്പെഷ്യാലിറ്റി ആശുപത്രികളും ഡോക്ടർമാരുമായി അടുത്ത ബന്ധം പുലർത്തുന്നതിലും അത് നിലനിർത്തുന്നതിലും അദ്ദേഹം ശ്രദ്ധിച്ചിരുന്നു.
കോഴിക്കോട് മാങ്കാവ് സ്വദേശിയാണ്. ഭാര്യ: ബിന്ദു. മക്കൾ: അഭിനന്ദ, അഭിറാം. പിതാവ്: പരേതനായ ശങ്കുണ്ണി. മാതാവ്: ഇന്ദിര. സഹോദരങ്ങൾ: വിജയൻ ആലപ്രത്ത്, ജസീത, സജിത. സംസ്ക്കാരം കോവിഡ് നിയന്ത്രണങ്ങൾ പാലിച്ച് ചൊവ്വാഴ്ച ഉച്ചക്ക് 12ന് മാങ്കാവ് ശ്മശാനത്തിൽ നടന്നു.