കോഴിക്കോട്: ജില്ലയിലെ ചോമ്പാല കുഞ്ഞിപ്പള്ളിയിൽ അഞ്ചു വയസുകാരനോട് ഓട്ടോ ഡ്രൈവറുടെ ക്രൂരത. സ്കൂളിലേക്ക് പോകുന്ന യാത്രക്കിടെ ഓട്ടോയിൽ തുപ്പിയ അഞ്ചു വയസുകാരനെ കൊണ്ട് വസ്ത്രം അഴിപ്പിച്ചു ഓട്ടോ തുടപ്പിക്കുക ആയിരുന്നു. ഇതിന്റെ ദൃശ്യങ്ങൾ സാമൂഹിക മാദ്ധ്യമങ്ങളിൽ പ്രചരിച്ചതോടെ ബാലാവകാശ കമ്മീഷൻ കേസെടുത്തു. ബുധനാഴ്ച ആണ് സംഭവം ഉണ്ടായത്.
സ്കൂളിലേക്ക് കുട്ടികളെ കൊണ്ടുപോകുന്ന ഓട്ടോയിലെ ഡ്രൈവർ കോറോത്ത് റോഡ് സ്വദേശി വിചിത്രനാണ് കുട്ടിയോട് ക്രൂരത കാട്ടിയത്. സ്കൂളിലേക്ക് പോകുംവഴി കുട്ടി വണ്ടിയിൽ നിന്ന് പുറത്തേക്ക് തുപ്പിയപ്പോൾ, തുപ്പൽ ഡ്രൈവറുടെ ദേഹത്ത് അബദ്ധത്തിൽ വീഴുകയായിരുന്നു. ഇതിൽ പ്രകോപിതനായ ഡ്രൈവർ, കുട്ടിയെ വണ്ടിയിൽ നിന്ന് പിടിച്ചിറക്കുകയും മറ്റു കുട്ടികളുടെ മുന്നിൽ വെച്ച് കുട്ടിയുടെ ഷർട്ട് അഴിപ്പിച്ചു തുപ്പൽ തുടപ്പിക്കുകയായിരുന്നു.
കുട്ടിയുടെ മാതാവാണ് ദൃശ്യം പകർത്തിയത്. തുടർന്ന് സാമൂഹിക മാദ്ധ്യമങ്ങളിൽ പ്രചരിച്ചതോടെയാണ് ബാലാവകാശ കമ്മീഷൻ കേസെടുത്തത്. സംഭവത്തിൽ ബാലാവകാശ കമ്മീഷൻ ചോമ്പാല പോലീസിനോട് റിപ്പോർട് തേടിയിട്ടുണ്ട്. അതേസമയം, സംഭവുമായി ബന്ധപ്പെട്ട പരാതികൾ ഒന്നും ഇതുവരെ കിട്ടിയില്ലെന്ന് ചോമ്പാല പോലീസ് വ്യക്തമാക്കി.
Most Read: രാജസ്ഥാനിലും മധ്യപ്രദേശിലുമായി മൂന്ന് വ്യോമസേനാ വിമാനങ്ങൾ തകർന്നുവീണു; ആളപായമില്ല