കാസര്‍ഗോഡ്: കോവിഡ് നിരീക്ഷണത്തിനും ഐസൊലേഷനും സംസ്ഥാനത്ത് ലഭിക്കാവുന്ന എറ്റവും നവീന ആശുപത്രി ഇന്ന് സര്‍ക്കാരിന് കൈമാറും. ചികിത്സാരംഗത്ത് ഏറെ പരിമിതികള്‍ നേരിടുന്ന കാസര്‍ഗോഡ് ജില്ലയിലെ തെക്കിന്‍ വില്ലേജിലാണ് ടാറ്റ ഗ്രൂപ്പ് 541 കിടക്കകളുള്ള നവീന ആശുപത്രി നിര്‍മിച്ചിരിക്കുന്നത്.
ആശുപത്രിയുടെ ഉദ്ഘാടനം മുഖ്യമന്ത്രി പിണറായി വിജയന്‍ ഇന്ന് ഉച്ചക്ക് 12-ന് വീഡിയോ കോണ്‍ഫറന്‍സിങ്ങിലൂടെ നിര്‍വഹിക്കും. ചടങ്ങില്‍ ടാറ്റ പ്രോജക്ട് ലിമിറ്റഡ് ഡി.ജി.എം. ഗോപിനാഥ റെഡ്ഡി കളക്ടര്‍ ഡോ. ഡി.സജിത് ബാബുവിന് താക്കോല്‍ കൈമാറും. രാജ്‌മോഹന്‍ ഉണ്ണിത്താന്‍ എം.പി. മുഖ്യാതിഥിയായിരിക്കും.
കോവിഡ് കാല പ്രതിസന്ധി മറികടക്കാന്‍ യുദ്ധകാലാടിസ്ഥാനത്തില്‍ പൂര്‍ത്തിയാക്കിയതാണ് ടാറ്റ ഗ്രൂപ്പ് ഈ ആശുപത്രി. തെക്കില്‍ വില്ലേജില്‍ അഞ്ചേക്കര്‍ ഭൂമി അതിവേഗത്തില്‍ ഏറ്റെടുത്തു നല്‍കിയത് സര്‍ക്കാരാണ്. അടിസ്ഥാനസൗകര്യ വികസനത്തിന് വിവിധ സ്ഥാപനങ്ങളുടെയും സംഘടനകളുടെയും സഹായം തേടി. കരിമ്പാറ നിറഞ്ഞ കുന്നുപ്രദേശം അതിവേഗം നിരപ്പാക്കി. വിവിധ വകുപ്പുകളെ ഏകോപിപ്പിച്ച് താത്കാലികമായി റോഡ്, വൈദ്യുതി, വെള്ളം എന്നിവയൊരുക്കി. 150 ദിവസങ്ങള്‍ കൊണ്ട് 60 കോടി രൂപ ചിലവിലാണ് ആശുപത്രി നിര്‍മാണം പൂര്‍ത്തിയാക്കിയിട്ടുള്ളത്.
ദേശീയപാതയില്‍നിന്ന് കോവിഡ് ആശുപത്രിയിലേക്ക് എളുപ്പമെത്താനുള്ള റോഡുകളുടെ നിര്‍മ്മാണം പുരോഗമിക്കുകയാണ്. കോവിഡ് കാലം കഴിഞ്ഞാലും സര്‍ക്കാരിന്റെ പൂര്‍ണ പിന്തുണ ഉണ്ടെങ്കില്‍ ആശുപത്രി തുടരാനാകും.
