കോഴിക്കോട്: വടക്കൻ കേരളത്തിലും മഴ ശക്തമാകുന്നു. കോഴിക്കോട് കോടഞ്ചേരിയിൽ ശക്തമായ മഴ തുടരുകയാണ്. നെല്ലിപ്പൊയിൽ ആനക്കാംപൊയിൽ റോഡിൽ മുണ്ടൂർ പാലത്തിൽ വെള്ളം കയറി. ഇവിടുത്തെ ഗതാഗതം തടസപ്പെട്ടിരിക്കുകയാണ്.
വൈകിട്ട് ആറരയോടെയാണ് കോഴിക്കോട്ടെ കിഴക്കൻ മലയോര മേഖലകളിൽ മഴ തുടങ്ങിയത്. കോടഞ്ചേരി, കൂരാച്ചുണ്ട്, തിരുവമ്പാടി ഉൾപ്പടെയുള്ള മേഖലകളിൽ മഴ കനക്കുകയാണ്. തിരുവമ്പാടി ടൗൺ വെള്ളത്തിനടിയിലാണ്. വൈകിട്ട് തിരുവമ്പാടിയിൽ ഓടിക്കൊണ്ടിരുന്ന കെഎസ്ആർടിസി ബസിന് മുകളിലേക്ക് തെങ്ങ് വീണിരുന്നു. തിരുവമ്പാടി ആനക്കാംപൊയിൽ പെരുമാളിപ്പടിക്ക് സമീപത്ത് ആയിരുന്നു അപകടം. സംഭവത്തിൽ ആർക്കും പരിക്കില്ലെന്നാണ് റിപ്പോർട്.
അതേസമയം, സംസ്ഥാനത്തെ സ്ഥിതി ഗൗരവതാരമെന്ന് മുഖ്യമന്ത്രി പിണറായി വിജയൻ അറിയിച്ചു. മഴക്കെടുതി രൂക്ഷമായ മേഖലകളിൽ കുടുങ്ങിപ്പോയവരെ രക്ഷിക്കാൻ സാധ്യമായ എല്ലാ മാർഗങ്ങളും ഉപയോഗിക്കും. അതിതീവ്ര മഴ തുടരുന്ന എല്ലാ പ്രദേശങ്ങളിലും രക്ഷാപ്രവർത്തനം ശക്തമാക്കാൻ സർക്കാരിന്റെ എല്ലാ സംവിധാനങ്ങളും രംഗത്തിറങ്ങുമെന്നും അദ്ദേഹം വ്യക്തമാക്കി.
Also Read: എൻഡോസൾഫാൻ ഇരയായ യുവാവിനെ പീഡിപ്പിച്ചു; പ്രതി അറസ്റ്റിൽ