തിരുവനന്തപുരം: സംസ്‌ഥാന ബജറ്റിലെ ഇന്ധന സെസ് അടക്കമുള്ള പ്രശ്‌നങ്ങളിൽ പ്രതിഷേധം ശക്‌തമാക്കി കോൺഗ്രസ്. പ്രതിഷേധത്തിന്റെ ഭാഗമായി യുഡിഎഫ് ഇന്ന് മുതൽ രാപ്പകൽ സമരം ആരംഭിക്കും. ഇന്ന് വൈകിട്ട് മൂന്ന് മണിക്ക് ആരംഭിച്ചു നാളെ രാവിലെ 10 മണിക്ക് അവസാനിക്കുന്ന രീതിയിലാണ് സമരം ക്രമീകരണം.
തിരുവനന്തപുരം സെക്രട്ടറിയേറ്റിന് മുമ്പിലും മറ്റ് ജില്ലകളിൽ കളക്‌ട്രേറ്റിന് മുന്നിലുമാണ് സമരം നടത്തുക. സംസ്‌ഥാനതല ഉൽഘാടനം പ്രതിപക്ഷ നേതാവ് വിഡി സതീശൻ കോഴിക്കോട്ട് നിർവഹിക്കും. തൃശൂരിൽ രമേശ് ചെന്നിത്തലയും സെക്രട്ടറിയേറ്റിന് മുന്നിൽ യുഡിഎഫ് കൺവീനർ എംഎം ഹസനും മലപ്പുറത്ത് പികെ കുഞ്ഞാലിക്കുട്ടിയും മറ്റു ജില്ലകളിൽ വിവിധ നേതാക്കളും സമരത്തിന് നേതൃത്വം നൽകും.
അതേസമയം, വയനാട്ടിൽ രാഹുൽ ഗാന്ധിയുടെ സന്ദർശനം ഉള്ളതിനാലും, കണ്ണൂർ ജില്ലയിൽ മുസ്‌ലിം ലീഗ് ജില്ലാ സമ്മേളനം ഉള്ളതിനാലും ജില്ലകളിലെ രാപ്പകൽ സമരം മറ്റൊരു ദിവസമായിരിക്കും നടക്കുക. അതിനിടെ, പാലക്കാട് ജില്ലയിൽ ഇന്ന് മുഖ്യമന്ത്രി പിണറായി വിജയൻ എത്തുന്നതിന്റെ ഭാഗമായി ഏഴ് യൂത്ത് കോൺഗ്രസ് പ്രവർത്തകരെ പോലീസ് കരുതൽ തടങ്കലിൽ പ്രവേശിപ്പിച്ചു.
യൂത്ത് കോൺഗ്രസ് പ്രവർത്തകരായ പ്രശോഭ്, സദ്ദാം ഹുസൈൻ, വിനോദ് ചെറാട്, ദീപക് പിഎസ്, പിഎസ് വിപിൻ, അരുൺ പ്രസാദ്, ഇഖ്ബാൽ എന്നിവരെയാണ് കരുതൽ തടങ്കലിലാക്കിയത്. ഇന്ധന സെസ് ഉൾപ്പടെ വർധിപ്പിച്ചതിൽ സംസ്‌ഥാനത്തുടനീളം കോൺഗ്രസിന്റെ നേതൃത്വത്തിൽ സമര പരിപാടികൾ നടക്കുകയാണ്. മുഖ്യമന്ത്രിയുടെ സുരക്ഷയുടെ ഭാഗമായാണ് ഏഴ് യൂത്ത് കോൺഗ്രസ് പ്രവർത്തകരെ കരുതൽ തടങ്കലിലാക്കിയത്.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
