മലപ്പുറം: വീടിന് മുകളിലേക്ക് മറിഞ്ഞ ഫോറസ്‌റ്റ് ജീപ്പ് എടുക്കാനുള്ള വനപാലകരുടെ ശ്രമം കുടുംബവും നാട്ടുകാരും ചേർന്ന് തടഞ്ഞു. കരുവാരക്കുണ്ട് ആർത്തല കോളനിയിലെ വെള്ളാരം കുന്നേൽ പ്രകാശന്റെ വീടിന് മുകളിലേക്ക് മറിഞ്ഞ ജീപ്പ് എടുക്കാനുള്ള ശ്രമമാണ് നാട്ടുകാർ ഉൾപ്പെട്ട് തടഞ്ഞത്. കുടുംബത്തിന് മതിയായ നഷ്‌ടപരിഹാരം നൽകാതെ വാഹനം എടുക്കാൻ സമ്മതിക്കില്ലന്ന നിലപാടിലാണ് ഇവർ.
ജൂൺ ഒൻപതിനാണ് നിയന്ത്രണം വിട്ട ഫോറസ്‌റ്റ് ജീപ്പ് വീടിന് മുകളിലേക്ക് മറിയുന്നത്. ആറ് വനപാലകർക്ക് പരിക്കേറ്റ അപകടത്തിൽ വീടിന്റെ അടുക്കള ഭാഗം പൂർണമായി തകരുകയും ചെയ്‌തിരുന്നു. ഇതേതുടർന്ന് നഷ്‌ടപരിഹാരം ലഭ്യമാക്കണമെന്ന് ആവശ്യപ്പെട്ട് നിലമ്പൂർ സൗത്ത് ഡിഎഫ്ഒയെ വീട്ടുടമ സമീപിച്ചെങ്കിലും വാഹനം എടുക്കുന്ന സമയത്ത് തുക നൽകാമെന്നായിരുന്നു മറുപടി.
എന്നാൽ നഷ്‌ടപരിഹാരം നൽകാതെ വാഹനം ക്രെയിൻ ഉപയോഗിച്ച് കൊണ്ടുപോകാൻ വനപാലകർ വെള്ളിയാഴ്‌ച ആർത്തലക്കുന്നിലെത്തി. തുടർന്നാണ് നഷ്‌ടപരിഹാരം ലഭ്യമാക്കാതെ വാഹനം കൊണ്ടുപോകാൻ അനുവദിക്കില്ലെന്ന് കുടുംബവും, നാട്ടുകാരും അറിയിച്ചത്. ഇതോടെ വനപാലകർ തിരിച്ച് പോകുകയായിരുന്നു.
അതേസമയം പോലീസിന്റെ മധ്യസ്‌ഥതയിലുള്ള ചർച്ചകൾക്ക് ശേഷമാകും ഇനി തുടർ നടപടികൾ ഉണ്ടാവുക. വീട് വാസയോഗ്യമല്ലാതായ സാഹചര്യത്തിൽ മതിയായ നഷ്‌ടപരിഹാരം കിട്ടാതെ ഒരു വിട്ടുവീഴ്‌ചയ്‌ക്കും തയ്യാറല്ലെന്ന ഉറച്ച നിലപാടിലാണ് പ്രകാശനും കുടുംബവും.
Malabar News: ബസ് സർവീസില്ല; വനത്തിൽ ഒറ്റപ്പെട്ട് ചേകാടി നിവാസികൾ
