മലപ്പുറം: റമളാനിൽ വൈവിധ്യമാര്‍ന്ന പ്രവര്‍ത്തനങ്ങളുമായി മഅ്ദിന്‍ അക്കാദമിയുടെ റമളാൻ ക്യാംപയിന്‍. ഹരിത പ്രോട്ടോകോളും സാമൂഹ്യ അകലം ഉള്‍പ്പെടെയുള്ള കോവിഡ് മുന്‍കരുതലും പാലിച്ചുകൊണ്ട് നാല്‍പതിന പരിപാടികളാണ് മഅ്ദിന്‍ ആസൂത്രണം ചെയ്‌തിട്ടുള്ളതെന്ന് ഭാരവാഹികൾ പത്രസമ്മേളനത്തിൽ അറിയിച്ചു.
റമളാന്‍ 27ആം രാവില്‍ നടക്കുന്ന പ്രാർഥനാ സമ്മേളനത്തോടെ ക്യാംപയിൻ സമാപിക്കും. കോവിഡിന്റെ രണ്ടാം തരംഗത്തിന്റെ പാശ്‌ചാതലത്തിൽ വേണ്ടത്ര മുന്‍കരുതലോടെയാണ് ഓരോ പദ്ധതികളും നടപ്പിലാക്കുക; മഅ്ദിന്‍ അധികൃതർ വ്യക്‌തമാക്കി.
മുഴുവൻ വിശാസികൾക്കും സംബന്ധിക്കാവുന്ന തരത്തിലുള്ളതാണ് ക്യാംപയിന്‍. കേള്‍വി-കാഴ്‌ചാ പരിമിതിയുള്ളവര്‍ക്ക് ആശ്വാസ കിറ്റ് വിതരണം, ബോധവല്‍ക്കരണ സംഗമം എന്നിവയും ഭിന്നശേഷിക്കാര്‍ക്ക് ശാക്‌തീകരണ സംഗമം, ഭിന്നശേഷി മേഖലയില്‍ പ്രവര്‍ത്തിക്കുന്നവരുടെ സ്‌നേഹ സംഗമം, എബിലിറ്റി വാക്‌സ്, ഏബ്ള്‍ടോക്, ഇഫ്‌താർ മീറ്റ്, വസ്‌ത്ര വിതരണം, വര്‍ക്ക് ഷോപ്പ്, ഈദ് മീറ്റ് എന്നിങ്ങനെ വിവിധ പരിപാടികൾ സംഘടിപ്പിക്കും.
കോവിഡ് മുന്‍കരുതലും വിശ്വാസികളുടെ സൗകര്യവും കണക്കിലെടുത്ത് ഗ്രാന്റ് മസ്‌ജിദിൽ ഒരു ദിവസം രണ്ട് തറാവീഹ് നിസ്‌കാരങ്ങള്‍ നടക്കും. 30 ജുസ്അ് പൂര്‍ത്തിയാക്കുന്ന ഖത്‍മുൽ ഖുര്‍ആന്‍ സൗകര്യത്തോടെയാണ് എല്ലാ ദിവസവും രാത്രി 11.30ന് നടക്കുന്ന തറാവീഹ് നിസ്‌കാരം. ഇത് വിവിധ തുറകളില്‍ ജോലി ചെയ്യുന്നവര്‍ക്ക് ഏറെ സൗകര്യപ്രദമാകുമെന്ന് മഅ്ദിന്‍ അധികൃതർ പറഞ്ഞു.
വനിതകള്‍ക്ക് ‘നല്ല കുടുംബം നല്ല സമൂഹം’ എന്ന ശീര്‍ഷകത്തില്‍ ഏപ്രില്‍ 15 മുതല്‍ മെയ് 6 വരെ വിജ്‌ഞാന വേദിയും ആത്‌മീയ സദസും നടക്കും. രാവിലെ 10 മുതല്‍ 12.30 വരെ നടക്കുന്ന പരിപാടിക്ക് സയ്യിദ് ഇബ്റാഹീമുല് ഖലീല്‍ അല്‍ ബുഖാരി, റഹ്‌മത്തുള്ള സഖാഫി എളമരം, ലുഖ്‌മാനുൽ ഹക്കീം സഖാഫി പുല്ലാര, ഇബ്റാഹീം ബാഖവി മേല്‍മുറി, അബൂബക്കര്‍ സഖാഫി അരീക്കോട്, അബ്‌ദുൽ അസീസ് സഖാഫി എലമ്പ്ര, അബ്‌ദുല്ലത്തീഫ് സഖാഫി കാന്തപുരം, സഫ്‌വാൻ സഖാഫി പത്തപ്പിരിയം തുടങ്ങിയവര്‍ നേതൃത്വം നല്‍കും. കര്‍മശാസ്‌ത്ര വിഷയങ്ങളില്‍ സംശയ നിവാരണത്തിനും അവസരമുണ്ടാവും. ക്ളാസിനെത്തുന്ന സ്‌ത്രീകളുടെ സൗകര്യത്തിനായി വിവിധ റൂട്ടുകളില്‍ സൗജന്യ വാഹന സൗകര്യം ഏര്‍പ്പെടുത്തും.
നോമ്പ് ഒന്ന് മുതല്‍ എല്ലാ ദിവസവും വൈകുന്നേരം 5.30 മുതല്‍ നോമ്പ് തുറവരെ പ്രമുഖ സയ്യിദൻമാരുടെ നേതൃത്വത്തില്‍ മഅദിന്‍ ഗ്രാന്റ് മസ്‌ജിദിൽ മജ്‌ലിസുൽ ബറക ആത്‌മീയ വേദി സംഘടിപ്പിക്കും. കേരളത്തിലെ സാമ്പത്തികമായി പിന്നോക്കം നില്‍ക്കുന്ന തിരഞ്ഞെടുത്ത കേന്ദ്രങ്ങളില്‍ റിലീഫ് ക്യാംപുകൾ സംഘടിപ്പിക്കും.
യാത്രക്കാര്‍, പരിസരത്തുള്ള ഹോസ്‌പിറ്റലുകളിലെ രോഗികള്‍, കൂട്ടിരിപ്പുകാര്‍ തുടങ്ങിയവരുടെ സൗകര്യത്തിനായി റമളാന്‍ മുപ്പത് ദിവസവും ഇഫ്‌താർ സംഗമം ഒരുക്കും. വെള്ളിയാഴ്‌ചകളിൽ രാവിലെ ഒമ്പത് മുതല്‍ പ്രത്യേക ആത്‌മീയ മജ്‌ലിസ് ഒരുക്കുന്നുണ്ട്. നോമ്പ് മുപ്പത് വരെ മഅ്ദിന്‍ ഗ്രാന്റ് മസ്‌ജിദിൽ ഹദീസ് ക്ളാസും ഇഅ്തികാഫ് ജല്‍സയുമുണ്ടാകും. ജല്‍സക്കെത്തുന്നവര്‍ക്ക് കോവിഡ് പ്രോട്ടോകോള്‍ പാലിച്ച് നോമ്പുതുറ, അത്താഴം, മുത്താഴം, താമസമടക്കമുള്ള സൗകര്യങ്ങള്‍ ഒരുക്കും.
റമളാനിലെ എല്ലാ ദിവസവും ഉച്ചക്ക് ഒന്ന് മുതല്‍ ഇസ്‌ലാമിക ചരിത്രപഠനം നടക്കും. ഗ്രാന്റ് മസ്‌ജിദിൽ നടക്കുന്ന പരിപാടിക്ക് പ്രമുഖ ചരിത്ര പണ്ഡിതന്‍ അബൂശാക്കിര്‍ സുലൈമാന്‍ ഫൈസി കിഴിശ്ശേരി നേതൃത്വം നല്‍കും. എല്ലാ ദിവസവും വൈകുന്നേരം നാലിന് നടക്കുന്ന കര്‍മശാസ്‌ത്ര പഠനത്തിന് സമസ്‌ത ജില്ലാ സെക്രട്ടറി ഇബ്റാഹീം ബാഖവി മേല്‍മുറി നേതൃത്വം നല്‍കും. സംശയ നിവാരണത്തിന് പ്രത്യേക സൗകര്യവും ഉണ്ടാകും.
ഖുര്‍ആന്‍ അവതരണ മാസം കൂടിയായ പുണ്യമാസത്തിലെ ഞായറാഴ്‌ചകളില്‍ ഏഴു മണിതൊട്ട് സ്‌കൂള്‍ ഓഫ് ഖുര്‍ആന്‍ സംഘടിപ്പിക്കുന്നുണ്ട്. സ്‌കൂള്‍ ഓഫ് ഖുര്‍ആന്‍ ഡയറക്‌ടർ അബൂബക്കര്‍ സഖാഫി അരീക്കോട് നേതൃത്വം നല്‍കും. ഖത്‍മുൽ ഖുര്‍ആന്‍, മഹല്ല് കൂട്ടായ്‌മ, പൂർവ വിദ്യാർഥി സംഗമം തുടങ്ങിയ പരിപാടികളും ക്യാംപയിന്‍ കാലയളവില്‍ സംഘടിപ്പിക്കും.
റമളാൻ ക്യാംപയിനു മുന്നോടിയായി നടന്ന പ്ളേ ബട്ടണ്‍ സോഷ്യന്‍ മീഡിയ ഇന്‍ഫ്ളുവന്‍സേഴ്‌സ്‌ സമ്മിറ്റ് ചെയര്‍മാന്‍ സയ്യിദ് ഇബ്റാഹീമുല്‍ഖലീല്‍ അല്‍ ബുഖാരി ഉൽഘാടനം ചെയ്‌തു. ഷെറിന്‍ ലാല്‍, മുഹമ്മദ് നൗഫല്‍ കോഡൂര്‍, ഉമര്‍ മേല്‍മുറി എന്നിവര്‍ വിവിധ സെഷനുകള്‍ക്ക് നേതൃത്വം നല്‍കി. സാമൂഹ മാദ്ധ്യമങ്ങളിൽ സജീവമായി ഇടപെടുന്ന അമ്പതോളം പേര്‍ പരിപാടിയില്‍ സംബന്ധിച്ചു.
റമളാൻ സന്ദേശം സമൂഹത്തിൽ എത്തിക്കുന്നതിന് മഅ്ദിന്‍ അക്കാദമിയില്‍ സംഘടിപ്പിച്ച ‘പ്ളേ ബട്ടണ്‍’ സോഷ്യല്‍ മീഡിയ സംഗമത്തില്‍ ‘ത്രീഡി എംപി ടിവി’ ഒമാന്‍ ഡയറക്‌ടർ സെറിന്‍ ലാല്‍ ‘ദൃശ്യ മാധ്യമങ്ങളിലെ പുതിയ പ്രവണതകള്‍’ എന്ന വിഷയത്തില്‍ ക്ളാസെടുക്കുന്നു.
സ്വലാത്ത് നഗറിലെ റംസാന്‍ പരിപാടികള്‍ മഅ്ദിന്‍ വെബ്സൈറ്റ് വഴിയും മറ്റ് ഓണ്‍ലൈന്‍ സംവിധാനങ്ങള്‍ വഴിയും വെബ്‌കാസ്‌റ്റ് ചെയ്യുന്നുണ്ട്. റംസാന്‍ ചൈതന്യം പകര്‍ന്ന് കൊടുക്കുന്ന സെമിനാറുകളും സംഘടിപ്പിക്കും; വാർത്താ സമ്മേളനത്തിൽ മഅ്ദിന്‍ അധികൃതർ വ്യക്‌തമാക്കി.
വാര്‍ത്താ സമ്മേളനത്തില്‍, സയ്യിദ് ഇബ്റാഹീമുല് ഖലീല്‍ അല്‍ ബുഖാരി (ചെയര്‍മാന്‍, മഅ്ദിന്‍ അക്കാദമി), ഉമര്‍ മേല്‍മുറി (ഡയറക്‌ടർ, മഅ്ദിന്‍ ഗ്ളോബൽ റിലേഷന്‍), മുഹമ്മദ് അസ്രത്ത് (മഅ്ദിന്‍ ഏബ്ള്‍ വേള്‍ഡ് ഡയറക്‌ടർ), അബ്‌ദുൽ ജലീല്‍ സഖാഫി കടലുണ്ടി (പ്രോഗ്രാം കണ്‍വീനര്‍), സൈനുദ്ധീന്‍ നിസാമി കുന്ദമംഗലം (പ്രോഗ്രാം കോ-ഓര്‍ഡിനേറ്റര്‍) എന്നിവർ പങ്കെടുത്തു.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
