ക്വാലലംപൂര്: മലേഷ്യ ഓപ്പണ് ബാഡ്മിന്റണ് ചാംപ്യന്ഷിപ്പിന് ഇന്ന് തുടക്കം. സിംഗിള്സില് പിവി സിന്ധു മാത്രമാണ് സീഡ് ചെയ്യപ്പെട്ട ഇന്ത്യന് താരം. ഇന്തോനേഷ്യ ഓപ്പണില് ആദ്യ റൗണ്ടില് പുറത്തായ സിന്ധുവിന്, തായ്ലന്ഡിന്റെ പോണ്പോവീ ആണ് ഇവിടെ ആദ്യ റൗണ്ടില് എതിരാളി. ഏഴാം സീഡായ സിന്ധു, ഇതുവരെയുള്ള അഞ്ച് മൽസരങ്ങളില് അഞ്ചിലും തായ് താരത്തെ തോല്പ്പിച്ചിട്ടുണ്ട്.
സൈന നെഹ്വാവാളും മൽസരിക്കുന്നുണ്ട്. കോമണ്വെല്ത്ത് ഗെയിംസിന് തയ്യാറെടുക്കുന്ന ഇന്ത്യന് താരങ്ങള്ക്ക് മികച്ച പ്രകടനം പുറത്തെടുക്കാനുള്ള അവസരം കൂടിയായാണ് മലേഷ്യ ഓപ്പണ് കണക്കാക്കുന്നത്. അടുത്ത മാസം 25 മുതല് ബര്മിങ്ഹാമിലാണ് കോമണ്വെല്ത്ത് ഗെയിംസ്.
അതേസമയം പുരുഷ സിംഗിള്സില് മികച്ച ഫോമിലുള്ള മലയാളി താരം എച്ച്എസ് പ്രണോയ്, മലേഷ്യയുടെ വെറ്ററന് താരം ഡാരന് ല്യൂവിനെ ആദ്യ റൗണ്ടില് നേരിടും. ഇന്തോനേഷ്യ ഓപ്പണില് പ്രണോയ് സെമിയില് പ്രവേശിച്ചിരുന്നു.
ലക്ഷ്യ സെന്നും കിഡംബി ശ്രീകാന്തും മലേഷ്യയില് മൽസരിക്കുന്നില്ല. ബി സായി പ്രണീത്, പി കശ്യപ്, സമീര് വര്മ്മ എന്നിവരും പുരുഷ വിഭാഗത്തില് മൽസരിക്കുന്നുണ്ട്.
Most Read: കാഠ്മണ്ഡുവിൽ പാനി പൂരി വിൽപനക്ക് നിരോധനം