മലപ്പുറം: സ്‌ത്രീ ശാക്‌തീകരണം ലക്ഷ്യമിട്ട് പുളിക്കൽ ഗ്രാമപഞ്ചായത്തിൽ കുടുംബശ്രീ അയൽക്കൂട്ടങ്ങൾ വഴി ‘നൈബർഹുഡ് മാർക്കറ്റുകൾ‘ സ്‌ഥാപിക്കാൻ തീരുമാനം. തദ്ദേശീയ ഉൽപന്നങ്ങൾക്ക് വിപണി കണ്ടെത്തുന്നതിനും സ്‌ത്രീകൾക്ക് ഉൽപാദന, വിപണന രംഗത്ത് തൊഴിൽ ഉറപ്പു വരുത്തുന്നതിനും വേണ്ടിയാണ് പദ്ധതി ആരംഭിക്കുന്നത്. ഇതിലൂടെ 400ഓളം സ്‌ത്രീകൾക്ക് തൊഴിൽ ലഭിക്കുമെന്ന് ബന്ധപ്പെട്ടവർ പറയുന്നു.
തനിമ, പരിശുദ്ധി, കേരളീയത എന്നീ തത്ത്വങ്ങളിൽ ഊന്നി നിർമിക്കുന്ന ശുദ്ധമായ ഉൽപന്നങ്ങളായിരിക്കും നൈബർഹുഡ് മാർക്കറ്റിൽ ലഭ്യമാക്കുകയെന്ന് പഞ്ചായത്ത് പ്രസിഡണ്ട് കെകെ മുഹമ്മദ് പറഞ്ഞു. ഉൽപന്നങ്ങളുടെ ഗുണനിലവാരം ഉറപ്പുവരുത്താൻ നടപടികളുണ്ടാകും.
കുടുംബശ്രീ ഹോം ഷോപ്പ് പദ്ധതിയുടെ ഭാഗമായാണ് പഞ്ചായത്തിൽ നൈബർഹുഡ് ഹോംഷോപ്പ് ആരംഭിക്കുന്നത്. പദ്ധതി പ്രാവർത്തികമാകുന്നതിലൂടെ കുടുംബശ്രീ യൂണിറ്റുകൾ നിർമിക്കുന്ന ഉൽപന്നങ്ങൾ സ്‌ഥിരമായി വീടുകളിൽ എത്തിക്കും.
പദ്ധതിയുമായി ബന്ധപ്പെട്ട് ചേർന്ന ആലോചനായോഗം പ്രസിഡണ്ട് കെകെ മുഹമ്മദ് ഉൽഘാടനം ചെയ്‌തു. വൈസ് പ്രസിഡണ്ട് ബേബി രജതി അധ്യക്ഷത വഹിച്ചു. ആയിഷാബി, സുഹറ ചേലാട്ട്, പി ഹിബത്തുള്ള, മേച്ചേരി സൽമാബി എന്നിവർ പ്രസംഗിച്ചു. പ്രസാദ് കൈതക്കൽ, കെ സതീശൻ എന്നിവർ പദ്ധതി വിശദീകരിച്ചു.
Malabar News: നാദാപുരം മാപ്പിള കലാ അക്കാദമി ഉപകേന്ദ്രം; ഉൽഘാടനം ഫെബ്രുവരി 20ന്
