പത്‌മജ കോൺഗ്രസിലേക്ക് മടങ്ങുമെന്ന് അഭ്യൂഹം; തൃശൂരിൽ എതിർപ്പ് ശക്‌തം

ബിജെപിയിൽ പ്രതീക്ഷിച്ച പദവികളോ സ്‌ഥാനമാനങ്ങളോ ലഭിക്കാത്തതും അവഗണന നേരിടേണ്ടി വന്നതുമാണ് പാർട്ടി വിടാനുള്ള തീരുമാനത്തിന് പിന്നിലെന്നാണ് പത്‌മജയുടെ അടുത്ത വൃത്തങ്ങൾ നൽകുന്ന വിവരം.

By Senior Reporter, Malabar News
Padmaja Venugopal
പത്‌മജ വേണുഗോപാൽ / Image Courtesy: Padmaja Venugopal FB Page

തൃശൂർ: പത്‌മജ വേണുഗോപാൽ ബിജെപി വിട്ട് കോൺഗ്രസിൽ തിരിച്ചെത്തുമെന്ന അഭ്യൂഹം ശക്‌തം. ഇന്നോ നാളെയോ ബിജെപി നേതൃത്വത്തിന് രാജിക്കത്ത് കൈമാറുമെന്നാണ് അടുത്ത വൃത്തങ്ങളിൽ നിന്ന് ലഭിക്കുന്ന സൂചന. ഇക്കാര്യത്തിൽ പത്‌മജയുടെ ഔദ്യോഗിക പ്രതികരണം വന്നിട്ടില്ല.

ബിജെപിയിൽ പ്രതീക്ഷിച്ച പദവികളോ സ്‌ഥാനമാനങ്ങളോ ലഭിക്കാത്തതും അവഗണന നേരിടേണ്ടി വന്നതുമാണ് പാർട്ടി വിടാനുള്ള തീരുമാനത്തിന് പിന്നിലെന്നാണ് പത്‌മജയുടെ അടുത്ത വൃത്തങ്ങൾ നൽകുന്ന വിവരം. ബിജെപി സംസ്‌ഥാന, ദേശീയ നേതൃത്വങ്ങളുമായി നടത്തിയ ചർച്ചകൾ ഫലം കാണാത്തതിനെ തുടർന്നാണ് പാർട്ടി വിടാനുള്ള തീരുമാനത്തിലേക്ക് എത്തിയതെന്നാണ് സൂചന.

അതേസമയം, പത്‌മജയുടെ തിരിച്ചുവരവിൽ തൃശൂർ ജില്ലയിലെ കോൺഗ്രസ് നേതാക്കളിലും പ്രവർത്തകരിലും ഒരു വിഭാഗത്തിന് കടുത്ത എതിർപ്പ് ഉള്ളതായാണ് വിവരം. പത്‌മജയെ പാർട്ടിയിൽ തിരിച്ചെടുക്കരുതെന്ന് ആവശ്യപ്പെട്ട് സംസ്‌ഥാന നേതൃത്വത്തെ സമീപിക്കാനാണ് ഇവരുടെ നീക്കം.

കോൺഗ്രസിലുള്ള കാലത്തും പത്‌മജയുമായി അഭിപ്രായവ്യത്യാസം ഉണ്ടായിരുന്ന വിഭാഗമാണ് ഇപ്പോൾ തിരിച്ചുവരവിനെതിരെ രംഗത്തുള്ളതെന്നാണ് വിവരം. പാർട്ടി വിട്ട് മറ്റൊരു രാഷ്‌ട്രീയ നിലപാട് സ്വീകരിച്ച ഒരാളെ വീണ്ടും സ്വീകരിക്കേണ്ടതില്ലെന്നാണ് ഇവരുടെ വാദം.

കോൺഗ്രസിലേക്കുള്ള മടക്കവുമായി ബന്ധപ്പെട്ട് പത്‌മജ ആദ്യം സംസാരിച്ചത് സഹോദരനും മന്ത്രിയുമായ കെ. മുരളീധരനോടാണ്. വിഷയം പാർട്ടി നേതൃത്വവുമായി ചർച്ച ചെയ്യണമെന്നായിരുന്നു അദ്ദേഹത്തിന്റെ നിർദ്ദേശമെന്നാണ് വിവരം. തുടർന്ന് സംസ്‌ഥാന നേതൃത്വവുമായും മുഖ്യമന്ത്രിയുമായും ആശയവിനിമയം നടത്തിയതായാണ് സൂചന.

പത്‌മജയുടെ മടങ്ങിവരവിനോട് നേതൃത്വത്തിന് വലിയ എതിർപ്പില്ലെന്നാണ് സൂചന. എന്നാൽ, കോൺഗ്രസിലേക്ക് തിരിച്ചെത്തുന്ന കാര്യത്തിൽ അന്തിമ തീരുമാനമായിട്ടില്ല. തൃശൂരിലെ ഒരു വിഭാഗം നേതാക്കളുടെ എതിർപ്പ് കൂടി പരിഗണിച്ചായിരിക്കും നേതൃത്വം നിലപാട് സ്വീകരിക്കുക. വിഷയം വരും ദിവസങ്ങളിൽ പാർട്ടിക്കുള്ളിൽ ചർച്ചയാകാനാണ് സാധ്യത.

Most Read| കേരള സ്‌റ്റാർട്ടപ്പ് മിഷന്റെ തലപ്പത്ത് ആദ്യമായി വനിത; ജൂബി ജോസ് പുതിയ സാരഥി

LEAVE A REPLY

Please enter your comment!
Please enter your name here

പ്രതികരണം രേഖപ്പെടുത്തുക

അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.

YOU MAY LIKE