പത്തനംതിട്ട: പോപ്പുലർ ഫിനാൻസ് തട്ടിപ്പ് കേസിൽ സിബിഐക്ക് കേരളാ പോലീസിന്റെ കത്ത്. അന്വേഷണം വേഗത്തിൽ ഏറ്റെടുക്കണം എന്നാവശ്യപ്പെട്ടാണ് സംസ്ഥാന പോലീസ് മേധാവി ലോക്നാഥ് ബെഹ്റ സിബിഐക്ക് കത്ത് നൽകിയത്. അന്വേഷണം സിബിഐക്ക് കൈമാറി ഹൈക്കോടതി ഉത്തരവ് വന്ന് ഒരുമാസം കഴിഞ്ഞിട്ടും കേസ് ഏറ്റെടുക്കാത്ത സാഹചര്യത്തിലാണ് ഇത്തരമൊരു കത്തയക്കാനുള്ള പോലീസിന്റെ നീക്കം. നിക്ഷേപകരുടെ ആശങ്കയും പോലീസ് നേരിടുന്ന വെല്ലുവിളികളും കത്തിൽ സൂചിപ്പിച്ചിട്ടുണ്ട്. പോലീസ് മേധാവിയുടെ കത്തിന്റെ അടിസ്ഥാനത്തിൽ സിബിഐ ഉടൻ കേസ് ഏറ്റെടുത്തേക്കും.
പോപ്പുലർ ഫിനാൻസ് കേസ് അന്വേഷണം ഏറ്റെടുക്കാൻ സിബിഐ നേരത്തെ വിമുഖത പ്രകടിപ്പിച്ചിരുന്നു. അന്വേഷണം സിബിഐയെ ഏൽപ്പിച്ച് സംസ്ഥാന സർക്കാർ ഉത്തരവിറക്കിയെങ്കിലും കേസ് ഏറ്റെടുക്കാൻ കഴിയില്ലെന്നാണ് സിബിഐ കോടതിയെ അറിയിച്ചിരുന്നത്. എന്നാൽ സിബിഐ നിലപാട് തള്ളിക്കൊണ്ട് ഹൈക്കോടതി ഉത്തരവ് പുറപ്പെടുവിക്കുക ആയിരുന്നു.
അതേസമയം പത്തനംതിട്ട ജില്ലയിലെ മൂഴിയാർ പോലീസ് സ്റ്റേഷനിൽ മൂന്ന് കേസുകളിൽ പ്രതികളുടെ അറസ്റ്റ് കഴിഞ്ഞ ദിവസം രേഖപ്പെടുത്തിയിരുന്നു. ആലപ്പുഴ അഡീഷണൽ സെഷൻസ് കോടതിയിൽ റിമാന്റ് റിപ്പോർട്ട് സമർപ്പിച്ചെങ്കിലും, സിബിഐ കേസ് ഏറ്റെടുത്തെന്നും അന്വേഷണ പരിധിയിലാണെന്നും പ്രതി ഭാഗം അഭിഭാഷകൻ വാദിച്ചതിനെ തുടർന്ന് കോടതി ഇത് സ്വീകരിച്ചില്ല.
Also Read: ശബരിമലയിൽ കോവിഡ് കൂടുന്നു; പരിശോധന കർശനമാക്കും