ന്യൂഡെൽഹി: സാഫ് കപ്പിൽ ഇന്ത്യയ്ക്ക് ഇനിയും കിരീട സാധ്യതയുണ്ടെന്ന് പരിശീലകൻ ഇഗോർ സ്റ്റിമാച്ച്. ടൂർണമെന്റിലെ മൂന്നാം മൽസരത്തിൽ നേപ്പാളിനെതിരെ ഇന്ത്യ ഇന്ന് ഇറങ്ങാനിരിക്കെയാണ് പരിശീലകന്റെ പ്രതികരണം.
സാഫ് കപ്പിൽ ബംഗ്ളാദേശിനെതിരെയും ശ്രീലങ്കക്കെതിരെയും സമനില വഴങ്ങേണ്ടി വന്ന ഇന്ത്യ നിലവിൽ സമ്മർദ്ദത്തിലാണ്. എന്നാൽ നന്നായി കളിച്ചാൽ ഇന്ത്യ ജയിക്കുമെന്നും മൽസരങ്ങൾ വിജയിക്കുന്നതിൽ മാത്രമാകണം ടീം ഇനി ശ്രദ്ധ കേന്ദ്രീകരിക്കേണ്ടതെന്നും സ്റ്റിമാച്ച് പറഞ്ഞു.
‘നന്നായി കളിച്ചാൽ ഉറപ്പായും നമുക്ക് ജയിക്കാം. ഇപ്പോൾ ജയിക്കുക എന്നതല്ലാതെ മറ്റ് വഴികളൊന്നും ഇല്ല. ഞങ്ങൾ ഇപ്പോളും ഇവിടെയുള്ളത് ടൂർണമെന്റ് വിജയിക്കാനാണ്. സാധ്യതകൾ ഇപ്പോളും തുറന്ന് കിടക്കുന്നു. എട്ടോ ഒൻപതോ പോയിന്റുകൾ നേടാനല്ല, മറിച്ച് ടൂർണമെന്റിൽ ജയിക്കാനാണ് ഞങ്ങൾ ഇവിടെയെത്തിയത്. ആറ് പോയിന്റ് നേടാനായാലും ഫൈനലിൽ എത്താനാകും,’ സ്റ്റിമാച്ച് വ്യക്തമാക്കി.
നിലവിൽ പോയിന്റ് പട്ടികയിൽ നാലാം സ്ഥാനത്താണ് ഇന്ത്യ.
Most Read: ‘എഗൈൻ ജിപിഎസ്’ പുതിയഗാനം; സന്നിധാനന്ദന്റെ ഗാനാലാപനം കേട്ടിരുന്നുപോകും