സംസ്ഥാനത്ത് കനത്ത മഴ വീണ്ടും പ്രളയസമാന സാഹചര്യം സൃഷ്ടിക്കുന്ന സാഹചര്യത്തിൽ ഫോൺ വിളിക്കുമ്പോൾ കേൾക്കുന്ന കൊറോണ സന്ദേശം കുറച്ചു നാളത്തേക്ക് ഒഴിവാക്കണമെന്ന അഭ്യർത്ഥനയുമായി നടൻ ഷെയ്ൻ നിഗം. ഫേസ്ബുക്ക് പോസ്റ്റിലാണ് താരത്തിന്റെ അഭ്യർത്ഥന. ഫോൺ ചെയ്യുമ്പോൾ കൊറോണ ബോധവൽക്കരണത്തിനായി സർക്കാർ നിർബന്ധമാക്കിയ ഈ സന്ദേശമാണ് ആദ്യം കേൾക്കുക. ചില ടെലികോം കമ്പനികൾ ഈ സന്ദേശം കേൾപ്പിച്ച ശേഷമാണ് ഫോൺ റിംഗ് നൽകുന്നത് പോലും. ഇതെല്ലാം കഴിഞ്ഞ് കോൾ കണക്ട് ആവാൻ ഒരുപാട് സമയം എടുക്കുന്നുണ്ട്. അതുകൊണ്ട് സംസ്ഥാനത്ത് മഴ നാശം വിതയ്ക്കുന്ന സാഹചര്യത്തിൽ തൽക്കാലത്തേക്കെങ്കിലും ഈ സന്ദേശം ഒഴിവാക്കണമെന്നാണ് ഷെയ്ൻ നിഗത്തിന്റെ അഭ്യർത്ഥന.
ഫേസ്ബുക്ക് പോസ്റ്റിന്റെ പൂർണ്ണരൂപം:
സർക്കാരുകളുടെ ശ്രദ്ധയിലേക്കാണ്..
ദയവായി ഫോൺ വിളിക്കുമ്പോൾ ഉള്ള കൊറോണ സന്ദേശം കുറച്ചു നാളത്തേക്ക് ഒഴിവാക്കണം എന്ന് അപേക്ഷിക്കുന്നു. കേരളം മറ്റൊരു പ്രളയ ഭീതിയിലാണ്. അത്യാവശ്യമായി ഫോൺ വിളിക്കുമ്പോൾ റെക്കോർഡ് ചെയ്‌തു വെച്ച സന്ദേശം മൂലം ഒരു ജീവൻ രക്ഷിക്കാൻ ഉള്ള സമയം പോലും നമുക്ക് നഷ്ടമായേക്കാം. ദയവായി ഉടൻ തന്നെ നടപടി എടുക്കുമെന്ന് പ്രതീക്ഷിക്കുന്നു
