കണ്ണൂർ: പയ്യന്നൂരിൽ വാടക കെട്ടിടത്തിൽ പൊള്ളലേറ്റ നിലയിൽ കണ്ടെത്തിയ കമിതാക്കൾ ചികിൽസയിൽ കഴിയവെ മരിച്ചു. ചിറ്റാരിക്കൽ എളേരിയാട്ടിലെ ശിവപ്രസാദ്, ഏഴിലോട് പുറച്ചേരിയിലെ ആര്യ എന്നിവരാണ് മരിച്ചത്. പയ്യന്നൂർ പഴയ ബസ് സ്‌റ്റാൻഡിന് സമീപത്തെ വാടക കെട്ടിടത്തിൽ കഴിഞ്ഞ 19നാണ് ഇരുവരെയും പൊള്ളലേറ്റ നിലയിൽ കണ്ടെത്തിയത്.
19ന് പരീക്ഷ കഴിഞ്ഞു കോളേജിൽ നിന്നും ഇറങ്ങിയ ആര്യയെ ശിവപ്രസാദ് കാറിൽ വന്ന് വാടക കെട്ടിടത്തിലേക്ക് കൂട്ടിക്കൊണ്ടു പോകുകയായിരുന്നു. തുടർന്ന് ഇരുവരും തീകൊളുത്തി ആത്‌മഹത്യക്ക് ശ്രമിച്ചു. ഗുരുതരമായി പൊള്ളലേറ്റ ഇരുവരെയും കണ്ണൂർ ഗവ. മെഡിക്കൽ കോളേജ് ആശുപത്രിയിലെത്തിച്ചു.
എന്നാൽ തിങ്കഴ്‌ച രാത്രി ഏഴ് മണിയോടെ ആര്യയും ചൊവ്വാഴ്‌ച പുലർച്ചെ ഒന്നരയോടെ ശിവപ്രസാദും മരണപ്പെടുകയായിരുന്നു.
പ്രണയത്തിലായിരുന്ന ഇരുവരുടെയും ബന്ധം വീട്ടുകാർ എതിർത്തതോടെയാണ് ആത്‌മഹത്യക്ക് മുതിർന്നതെന്നാണ് ലഭിക്കുന്ന വിവരം. ആര്യയുടെ വിവാഹ നിശ്‌ചയം നടക്കാനിരിക്കെയാണ് സംഭവം.
Malabar News: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ചു; മാതാവും രണ്ടാനച്ഛനും അടക്കം എട്ടുപേര്‍ക്ക് തടവുശിക്ഷ
