കോഴിക്കോട്: ജില്ലയിൽ മെഡിക്കൽ കോളേജിലും പരിസരത്തും മോഷണം വർധിക്കുന്നു. പോലീസ് കോവിഡ് പ്രതിരോധ പ്രവർത്തനങ്ങളിൽ ഏർപ്പെട്ടിരിക്കുന്നത് മുതലെടുത്താണ് മോഷണം തുടരുന്നതെന്ന് ആളുകൾ പറയുന്നു. കോവിഡ് പശ്‌ചാത്തലത്തിൽ മെഡിക്കൽ കോളേജിലേക്ക് വരുന്ന ആളുകളുടെ എണ്ണം കുറഞ്ഞതും മോഷ്‌ടാക്കൾക്ക് സഹായകമായി.
Kozhikkod News: കെ.എസ്.ആര്‍.ടി.സി ഡിപ്പോയില്‍ ഭക്ഷണ വിതരണ കൗണ്ടര്‍ ആരംഭിക്കാനുള്ള പദ്ധതി ഇല്ലാതാകുന്നു
മെഡിക്കൽ കോളേജിന് അകത്തും പുറത്തും ബൈക്കിലെത്തുന്ന കവർച്ചാ സംഘം മാല പൊട്ടിച്ച് രക്ഷപെടുന്ന സംഭവങ്ങളും ആവർത്തിക്കുന്നുണ്ട്. ക്വാർട്ടേഴ്‌സിന് അകത്ത് താമസിക്കുന്ന വനിതാ ജീവനക്കാരാണ് കൂടുതലായും കവർച്ചക്ക് ഇരയാകുന്നത്. കോളേജിന് അകത്ത് മാത്രം തുടർച്ചയായ മൂന്ന് സംഭവങ്ങളാണ് കഴിഞ്ഞ ആഴ്‌ച നടന്നത്.
കുറച്ച് ദിവസങ്ങൾക്ക് മുമ്പ് വഴിയാത്രക്കാരിയായ സ്‌ത്രീയെ ബൈക്കിലെത്തിയ ഒരു സംഘം അടിച്ച് വീഴ്‌ത്തി പണവും മൊബൈൽ ഫോണും കവർന്നിരുന്നു. വഴിയരികിൽ പാർക്ക് ചെയ്യുന്ന ബൈക്കുകളും മോഷണം പോവാറുണ്ട്. മെഡിക്കൽ കോളേജിൽ മോഷണം തുടർകഥ ആകുന്ന സാഹചര്യത്തിൽ കോളേജിന് അകത്തും പുറത്തും കനത്ത സുരക്ഷ ഏർപ്പെടുത്തിയിട്ടുണ്ടെന്ന് പോലീസ് അറിയിച്ചു.
