ഹൈദരാബാദ്: പ്രളയത്തിൽ മുങ്ങിയ തെലങ്കാനക്കായി സഹായമഭ്യർഥിച്ച് നടൻ വിജയ് ദേവരകൊണ്ട. “ഞങ്ങൾ കേരളത്തിനായി മുന്നോട്ടു വന്നു, ചെന്നൈക്കായി മുന്നോട്ടു വന്നു, സൈന്യത്തിനായി മുന്നോട്ടു വന്നു, കോവിഡിനിടയിൽ പലകാര്യങ്ങൾക്കും ഞങ്ങൾ ഒരുമിച്ച് നിന്നു. ഇപ്പോൾ ഞങ്ങളുടെ നാടും ജനങ്ങളും സഹായം തേടുകയാണ്,”- വിജയ് ദേവരകൊണ്ട ട്വീറ്റ് ചെയ്തു.
കർണാടക മുഖ്യമന്ത്രിയുടെ ദുരിതാശ്വാസ നിധിയിലേക്ക് 10 ലക്ഷം രൂപ വിജയ് ദേവരകൊണ്ട സംഭാവന നൽകി. “ഈ വർഷം എല്ലാവർക്കും വിഷമകരമായ വർഷമാണ്. ഭേദപ്പെട്ട നിലയിൽ നിൽക്കുന്നവർ ബുദ്ധിമുട്ടനുഭവിക്കുന്നവരെ കഴിയുംവിധം സഹായിക്കാൻ മനസുകാണിക്കണം. ഒരിക്കൽ കൂടി നമ്മളിൽപ്പെട്ടവരെ നമുക്ക് സഹായിക്കാം. സി.എം.ആർ.എഫിലേക്ക് ഞാൻ 10 ലക്ഷം രൂപ സംഭാവന നൽകുന്നു,”- അദ്ദേഹം മറ്റൊരു ട്വീറ്റിൽ പറഞ്ഞു. 2018ൽ കേരളം പ്രളയത്തെ അഭിമുഖീകരിച്ചപ്പോൾ താരം അഞ്ചു ലക്ഷം രൂപ മുഖ്യമന്ത്രിയുടെ ദുരിതാശ്വാസ നിധിയിലേക്ക് നൽകിയിരുന്നു.
We came together for Kerala
We came together for Chennai
We came together for the Army
We came together in huge numbers for each other during Corona
This time our city and our people need a helping hand..#HyderabadRains pic.twitter.com/pahnuNTXfi— Vijay Deverakonda (@TheDeverakonda) October 20, 2020
വിജയ് ദേവരകൊണ്ടയെ കൂടാതെ ജൂനിയർ എൻടിആർ, ചിരഞ്ജീവി, മഹേഷ് ബാബു, നാഗാർജുന എന്നിവരും തെലങ്കാനക്ക് സഹായഹസ്തവുമായി എത്തി. ജൂനിയർ എൻടിആർ 50 ലക്ഷം രൂപയും ചിരഞ്ജീവിയും മഹേഷ് ബാബുവും ഒരു കോടി രൂപ വീതവും നാഗാർജുന 50 ലക്ഷം രൂപയും മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നൽകി.