മലപ്പുറം: കരിപ്പൂർ വിമാനത്താവളത്തിൽ നിന്നും 79 ലക്ഷത്തിന്റെ സ്വർണം പിടികൂടി. തുടർന്ന് ദുബായിൽനിന്ന് ഫ്ളൈ ദുബായ് വിമാനത്തിൽ എത്തിയ കോഴിക്കോട് നാദാപുരം സ്വദേശി പി അജ്മലിനെ കസ്റ്റംസ് അറസ്റ്റ് ചെയ്തു. വസ്ത്രത്തിനുള്ളിൽ ഒളിപ്പിച്ചു കടത്താൻ ശ്രമിച്ച നിലയിലാണ് സ്വർണം കണ്ടെടുത്തത്.
കോഴിക്കോട് ഡിആർഐക്ക് ലഭിച്ച രഹസ്യവിവരത്തെ തുടർന്ന് വിമാനത്താവളത്തിലെ എയർ കസ്റ്റംസ് ഇന്റലിജൻസ് നടത്തിയ പരിശോധനയിലാണ് സ്വർണക്കടത്ത് പിടികൂടിയത്. 1.87 കിലോഗ്രാം മിശ്രിതത്തിൽനിന്ന് 1.63 കിലോഗ്രാം സ്വർണം കണ്ടെടുത്തതായി കസ്റ്റംസ് അറിയിച്ചു.
ഡെപ്യൂട്ടി കമ്മിഷണർ ടിഎ കിരൺ, സൂപ്രണ്ടുമാരായ സിപി സബീഷ്, എം ഉമാദേവി, സന്തോഷ് ജോൺ, ഇൻസ്പെക്ടർമാരായ എൻ റഹീസ്, കെകെ പ്രിയ, അർജുൻ കൃഷ്ണ, പൗരുഷ് റോയൽ, വിരേന്ദ്ര പ്രതാപ് ചൗധരി, ദിനേഷ് മിർദ, ഹെഡ് ഹവിൽദാർമാരായ എസ് ജമാലുദ്ദീൻ, എ വിശ്വരാജ് എന്നിവരാണ് സ്വർണം പിടികൂടിയത്.
Read also: മാർഗ നിർദ്ദേശങ്ങൾ ലംഘിച്ചു; സ്പൈസ് ജെറ്റിന് കേന്ദ്രത്തിന്റെ കുരുക്ക്
