മക്ക: ഉംറ തീര്‍ത്ഥാടനം പുനഃരാരംഭിക്കുന്നതിന് മുന്നോടിയായി കര്‍ശന മാര്‍ഗ നിര്‍ദേശങ്ങള്‍ പുറത്തിറക്കി സൗദി അറേബ്യ. കോവിഡ് പശ്ചാത്തലത്തില്‍ നിര്‍ത്തി വച്ചിരുന്ന ഉംറ ഏഴ് മാസത്തെ ഇടവേളക്ക് ശേഷം ഒക്ടോബര്‍ നാല് മുതലാണ് വീണ്ടും ആരംഭിക്കുന്നത്. ആദ്യഘട്ടത്തില്‍ രാജ്യത്ത് അകത്തുള്ളവര്‍ക്ക് മാത്രമാണ് അനുമതി. നവംബര്‍ ഒന്നു മുതല്‍ തീര്‍ത്ഥാടനം പൂര്‍ണ്ണതോതിലാകും.
ഉംറ തീര്‍ത്ഥാടനത്തിനെത്തുന്ന ആളുകള്‍ കോവിഡ് മാര്‍ഗ നിര്‍ദേശങ്ങള്‍ കൃത്യമായി പാലിക്കുന്നുണ്ടെന്ന് ഉറപ്പാക്കുമെന്ന് സൗദി ഹജ്ജ്-ഉംറ കാര്യാലയം അറിയിച്ചു.
തീര്‍ഥാടകര്‍ക്ക് രണ്ട് തവണ ഉംറ ചെയ്യാന്‍ അനുമതിയുണ്ടാവുമെന്നും രണ്ട് ഉംറകള്‍ക്കിടയില്‍ 14 ദിവസത്തെ ഇടവേള നിര്‍ബന്ധമാണെന്നും മന്ത്രാലയത്തിന്റെ ചീഫ് പ്ലാനിംഗ് ആന്‍ഡ് സ്ട്രാറ്റജി ഓഫീസര്‍ ഡോ.അല്‍ മദ്ദാഹ് അറിയിച്ചു. കൊറോണ വൈറസിനെ പ്രതിരോധിക്കാന്‍ ആവശ്യമായ മുന്‍കരുതല്‍ നടപടികള്‍ക്ക് അനുസൃതമായി എല്ലാവര്‍ക്കും ഉംറ നിര്‍വഹിക്കാന്‍ അവസരം ഉണ്ടായിരിക്കുമെന്നും അദ്ദേഹം പറഞ്ഞു.
കൂടാതെ സാമൂഹിക അകലം അടക്കമുള്ള കര്‍ശന നിര്‍ദേശങ്ങള്‍ തീര്‍ത്ഥാടകര്‍ പിന്തുടരുന്നുണ്ടെന്നും അനുവദിച്ച സമയത്തിനുള്ളില്‍ തന്നെ ഉംറ നിര്‍വഹിച്ച് മടങ്ങുന്നുവെന്നും ഉറപ്പാക്കാന്‍ ഓരോ സംഘത്തിനൊപ്പവും ഓരോ സൂപ്പര്‍വൈസര്‍ വീതം ഉണ്ടാകും. രോഗലക്ഷണങ്ങള്‍ ഉള്ളവര്‍ ശ്രദ്ധയില്‍പ്പെട്ടാല്‍ അവര്‍ക്കായി പ്രത്യേക ഐസലേഷന്‍ സംവിധാനവും ഒരുക്കിയിട്ടുണ്ട്.
ഇതുവരെയായി 35000 അപേക്ഷകള്‍ ഉംറ നിര്‍വഹിക്കുന്നതിനായി ലഭിച്ചെന്ന് ഡോ.അല്‍ മദ്ദാഹ് അറബ് ന്യൂസിനോട് പറഞ്ഞു.
Read Also: ഐടി വകുപ്പിലെ നിയമനങ്ങള്‍ ചട്ടങ്ങള്‍ ലംഘിച്ച്
തീര്‍ത്ഥാടനത്തിന്റെ സുഗമമായ നടത്തിപ്പിനായി ഘട്ടം ഘട്ടമായുള്ള പദ്ധതികളാണ് ഭരണകൂടം തയ്യാറാക്കിയിരിക്കുന്നത്. ആദ്യഘട്ടത്തില്‍ ദിവസം ആറ് പ്രാവശ്യം ഉംറക്ക് അനുമതിയുണ്ടാകും. കൂടാതെ ഉംറ നിര്‍വഹിക്കാന്‍ ഓരോ തീര്‍ഥാടകനും മൂന്ന് മണിക്കൂര്‍ വീതം സമയവും അനുവദിക്കും. അതേസമയം സൂര്യാസ്തമയത്തിനും വൈകുന്നേരത്തെ ആരാധനക്കും ഇടക്കുള്ള സമയത്ത് ഉംറക്ക് അനുമതി ഉണ്ടാവുകയില്ല. ആ സമയം ശുചീകരണത്തിനും അണുനശീകരണത്തിനും ഉപയോഗപ്പെടുത്തും.
രണ്ട് ആഴ്‌ചകള്‍ക്ക് ശേഷം ആരംഭിക്കുന്ന അടുത്ത ഘട്ടത്തില്‍ ആദ്യ ഘട്ടത്തിലെ കുറവുകള്‍ കൃത്യമായി വിശകലനം ചെയ്യുമെന്നും പിന്നീട് അത് പരിഹരിച്ചു കൊണ്ടുള്ള സംവിധാനങ്ങളാകും ഉണ്ടാവുകയെന്നും ഡോ.അല്‍ മദ്ദാഹ് വ്യക്തമാക്കി. കൂടാതെ ഹജ്ജ്-ഉംറ തീര്‍ത്ഥാടനങ്ങള്‍ക്കായി അധിക ജാഗ്രതയാണ് സൗദി ഭരണകൂടം വച്ചു പുലര്‍ത്തുന്നതെന്നും ലോകത്തിന്റെ വിവിധ കോണുകളില്‍ നിന്നും എത്തുന്ന ആളുകളുടെ സുരക്ഷയും സംരക്ഷണവുമാണ് ഭരണഘടന ലക്ഷ്യം വെക്കുന്നതെന്നും അദ്ദേഹം കൂട്ടിച്ചേര്‍ത്തു.
National News: സോമാറ്റോ,സ്വിഗ്ഗി കമ്പനികള്‍ക്ക് ഗൂഗിളിന്റെ നോട്ടീസ്
