പാലക്കാട്: ശക്തമായ മഴയിൽ ജില്ലയിലെ ഡാമുകൾ തുറന്നതോടെ പുഴകളിലെ ജലനിരപ്പ് വർധിച്ചു. വെള്ളിയാങ്കല്ല് തടയണയുടെ 25 ഷട്ടറുകൾ ഉയർത്തിയതോടെ ഭാരതപ്പുഴയിലെ നീരൊഴുക്ക് കൂടിയിട്ടുണ്ട്. കാഞ്ഞിരപ്പുഴ ഡാമിന്റെ ഷട്ടറുകൾ തുറന്നതും തൂതപ്പുഴയിലെ ഒഴുക്കും കൂടാൻ കാരണമായി. ഇതോടെ പുഴകൾ കരകവിഞ്ഞൊഴുകി സമീപ പ്രദേശങ്ങളിൽ വെള്ളം കയറി തുടങ്ങി.
മൂർക്കനാട്, വിളയൂർ, തിരുവേഗപ്പുറ, ഇരിമ്പിളിയം, പരത്തുർ പഞ്ചായത്തുകളിലൂടെ ഒഴുകുന്ന പുഴ കരിയന്നൂരിൽ വെച്ചാണ് ഭാരതപ്പുഴയിൽ ചേരുന്നത്. ഇതോടെ ഭാരതപ്പുഴയിൽ നീരൊഴുക്ക് അതി ശക്തമായി കൂടിയതായി അധികൃതർ പറഞ്ഞു. ഇതോടെ പുഴകളുടെ കരകളിൽ താമസിക്കുന്നവർക്ക് അധികൃതർ ജാഗ്രതാ മുന്നറിയിപ്പ് നൽകിയിട്ടുണ്ട്. കാഞ്ഞിരപ്പുഴ ഡാം, വെള്ളിയാങ്കല്ല് അണക്കെട്ട് എന്നിവയുടെ വൃഷ്ടി പ്രദേശങ്ങളിൽ കനത്ത മഴ തുടരുകയാണ്.
Read Also: വാക്സിൻ ക്ഷാമം; സംസ്ഥാനത്ത് നാളെ മുതൽ വിതരണം മുടങ്ങിയേക്കും