പത്തനംതിട്ട : പത്തനംതിട്ട ജില്ലാ പഞ്ചായത്തില്‍ നിന്നും ‘മോഡിക്ക്’ മികച്ച വിജയം. പ്രധാനമന്ത്രിയുമായി ഇദ്ദേഹത്തിന് യാതൊരു ബന്ധവുമില്ല. ഇത് പത്തനംതിട്ട ജില്ലാ പഞ്ചായത്തിലെ മലയാലപ്പുഴ ഡിവിഷനില്‍ നിന്നും എല്‍ഡിഎഫ് സ്‌ഥാനാര്‍ഥിയായി മല്‍സരിച്ച ജിജോ മോഡിയാണ്. ഇത്തവണത്തെ തിരഞ്ഞെടുപ്പില്‍ പേര് കൊണ്ട് വളരെയധികം ശ്രദ്ധ നേടിയ സ്‌ഥാനാര്‍ഥിയാണ് ജിജോ മോഡി. ഇദ്ദേഹം യുഡിഎഫ് സ്‌ഥാനാര്‍ഥിയെ പരാജയപ്പെടുത്തിയാണ് മലയാലപ്പുഴ ഡിവിഷനില്‍ നിന്നും വിജയിച്ചത്.
യുഡിഎഫ് സ്‌ഥാനാര്‍ഥിക്കെതിരെ 15,199 വോട്ടുകള്‍ നേടിയാണ് ജിജോ ജില്ലാ പഞ്ചായത്തിലേക്ക് തിരഞ്ഞെടുക്കപ്പെട്ടത്. 2,073 വോട്ടിന്റെ ഭൂരിപക്ഷം നേടാന്‍ ജിജോക്കായി. നിലവില്‍ യുഡിഎഫ് ഭരിക്കുന്ന മലയാലപ്പുഴ ഡിവിഷനില്‍ ഇത് ജിജോ നേടിയ വലിയ വിജയം തന്നെയാണ്.
മോഡിയില്‍ എന്ന കുടുംബപ്പേര് ചുരുക്കി തന്റെ പേരിനൊപ്പം ‘മോഡി’ എന്ന് ചേര്‍ത്ത ജിജോ എസ്എഫ്‌ഐയിലൂടെയാണ് രാഷ്‌ട്രീയ രംഗത്തേക്ക് എത്തുന്നത്. തുടര്‍ന്ന് ഡിവൈഎഫ്ഐയിലും പ്രവര്‍ത്തിച്ച ജിജോ നിലവില്‍ സിപിഐഎം കോന്നിതാഴം ലോക്കല്‍ കമ്മിറ്റി സെക്രട്ടറിയാണ്.
Read also : സുൽത്താൻ ബത്തേരിയിൽ ഒരു വാർഡിൽ റീപോളിംഗ്
