തിരുവനന്തപുരം: തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിൽ തപാൽ വോട്ടിനായുള്ള അപേക്ഷകൾ ഇന്ന് മുതൽ സ്വീകരിക്കും. കോവിഡ് ചികിൽസയിൽ ഉള്ളവർക്കും ക്വാറന്റെയ്നിൽ കഴിയുന്നവർക്കും സ്പെഷ്യൽ തപാൽ വോട്ട് അനുവദിച്ചുകൊണ്ടുള്ള പട്ടിക (സർട്ടിഫൈഡ് ലിസ്റ്റ്) നാളെ മുതൽ തയ്യാറാക്കി തുടങ്ങും.
ഡിസംബർ 7ന് വൈകിട്ട് 3 മണി വരെ കോവിഡ് പോസിറ്റീവ് ആവുകയോ നിരീക്ഷണത്തിൽ പ്രവേശിക്കുകയോ ചെയ്യുന്നവർക്കാകും സ്പെഷ്യൽ തപാൽ വോട്ടിന് അനുമതിയുണ്ടാകുക. അതിന് ശേഷം സ്ഥിരീകരിക്കുന്നവര്ക്ക് അവസാന മണിക്കൂറില് ബൂത്തില് നേരിട്ടെത്തി വോട്ട് ചെയ്യാം. പട്ടികയുടെ അടിസ്ഥാനത്തിൽ സ്പെഷ്യൽ പോളിങ് ഓഫീസർമാർ വീടുകളിൽ തപാൽ ബാലറ്റ് എത്തിക്കും.
ഡിസംബർ 8, 10, 14 തീയതികളിലാണ് സംസ്ഥാനത്ത് തദ്ദേശ സ്ഥാപനങ്ങളിലേക്കുള്ള തിരഞ്ഞെടുപ്പ് നടക്കുന്നത്. ഡിസംബർ 16നാണ് വോട്ടെണ്ണൽ. 1200 തദ്ദേശ സ്ഥാപനങ്ങളിൽ 1199 സ്ഥാപനങ്ങളിലേക്കാണ് തിരഞ്ഞെടുപ്പ്. 941 ഗ്രാമ പഞ്ചായത്തുകള്, 152 ബ്ളോക്ക് പഞ്ചായത്തുകള്, 14 ജില്ലാ പഞ്ചായത്തുകള്, 86 മുനിസിപ്പാലിറ്റികള്, 6 മുനിസിപ്പല് കോര്പറേഷനുകള് എന്നിവിടങ്ങളിലായി 21,865 വാര്ഡുകളിലേക്കാണ് ഈ വര്ഷം തിരഞ്ഞെടുപ്പ്.
Also Read: കിഫ്ബി വിവാദം; മസാലബോണ്ട് അനുമതിയോടെ തന്നെയെന്ന് ആർബിഐ