ന്യൂഡെല്‍ഹി: പുതിയ സിബിഐ ഡയറക്‌ടറെ തിരഞ്ഞെടുക്കാനുള്ള ഉന്നതതല യോഗം മെയ് 24ന് പ്രധാനമന്ത്രിയുടെ അധ്യക്ഷതയില്‍ ചേരും. ചീഫ് ജസ്‌റ്റിസ് എന്‍വി രമണ, ലോക്‌സഭയിലെ കോണ്‍ഗ്രസ് കക്ഷി നേതാവ് അധിര്‍ രഞ്‌ജന്‍ ചൗധരി എന്നിവരും യോഗത്തില്‍ പങ്കെടുക്കും. സിബിഐ ഡയറക്‌ടര്‍ സ്‌ഥാനത്തേക്ക് പരിഗണിക്കുന്ന ഐപിഎസ് ഉദ്യോഗസ്‌ഥരുടെ പേരുകള്‍ സമിതി അംഗങ്ങള്‍ക്ക് സര്‍ക്കാര്‍ കൈമാറി.
സിബിഐ താൽക്കാലിക ഡയറക്‌ടര്‍ പ്രവീണ്‍ സിന്‍ഹ, ബിഎസ്എഫ് മേധാവി രാകേഷ് അസ്‌താന, എന്‍ഐഎ മേധാവി വൈസി മോദി, സിഐഎസ്എഫ് മേധാവി സുബോധ് കാന്ത് ജയ്സ്വാള്‍, ഐടിബിപി മേധാവി എസ്എസ് ദേസ്വാള്‍, ഉത്തര്‍പ്രദേശ് ഡിജിപി ഹിതേഷ് ചന്ദ്ര അവാസ്‌ഥി എന്നിവരെ കൂടാതെ കേരളാ ഡിജിപി ലോക്‌നാഥ് ബെഹ്‌റയും പരിഗണനാ പട്ടികയിലുണ്ട്.
1985 ബാച്ച് കേരളാ കേഡര്‍ ഐപിഎസ് ഉദ്യോഗസ്‌ഥനാണ് ലോക്‌നാഥ് ബെഹ്‌റ. ആലപ്പുഴ എഎസ്‌പി ആയി സർവീസ് ആരംഭിച്ച ശേഷം തിരുവനന്തപുരം സിറ്റി പോലീസ് ഡെപ്യൂട്ടി കമ്മീഷണര്‍, കൊച്ചി പോലീസ് കമ്മീഷണര്‍, പോലീസ് ആസ്‌ഥാനത്ത് ഐജി, എഡിജിപി നവീകരണം, വിജിലന്‍സ് ഡയറക്‌ടര്‍ എന്നീ തസ്‍തികകളിലും പ്രവര്‍ത്തിച്ചിട്ടുണ്ട്.
Read also: മമതയുടെ വിമര്‍ശനങ്ങള്‍ തള്ളി; ബംഗാളിലെ സംഘര്‍ഷം നടന്ന മേഖലകള്‍ സന്ദര്‍ശിച്ച് ഗവര്‍ണര്‍
