കോഴിക്കോട്: പ്രായപൂർത്തിയാകാത്ത പെൺകുട്ടിയെ ദിവസങ്ങളോളം വീട്ടിൽ ഒളിപ്പിച്ച് താമസിപ്പിച്ച് പീഡിപ്പിച്ച കേസിലെ പ്രതി അറസ്‌റ്റിൽ. പയ്യോളി പുതിയോട്ടിൽ ഫഹദ് (29) ആണ് അറസ്‌റ്റിലായത്‌. ബാലുശ്ശേരി എസ്എച്ച്ഒ ജീവൻ ജോർജ് പോക്‌സോ നിയമപ്രകാരമാണ് പ്രതിയെ അറസ്‌റ്റ് ചെയ്‌തത്‌.
ഈ മാസം 12ന് ആണ് പെൺകുട്ടിയെ കാണാതാകുന്നത്. ബന്ധുക്കൾ പരാതി നൽകിയതിനെ തുടർന്ന് അന്വേഷണം നടത്തിയ പോലീസ് നാല് ദിവസത്തിനു ശേഷം പെൺകുട്ടിയെ പ്രതിയുടെ പയ്യോളിയിലെ വീട്ടിൽ വച്ച് കണ്ടെത്തുകയായിരുന്നു. വിവാഹ വാഗ്‌ദാനം നൽകിയാണ് പ്രതി പെൺകുട്ടിയെ വീട്ടിൽ എത്തിച്ചതെന്ന് പോലീസ് പറഞ്ഞു.
പോലീസ് എത്തിയപ്പോഴേക്കും പ്രതി വീട്ടിൽ നിന്ന് കടന്നുകളഞ്ഞിരുന്നു. തുടർന്ന് സൈബർ സെല്ലിന്റെ സഹായത്തോടെ നടത്തിയ അന്വേഷണത്തിൽ മറ്റൊരു വീട്ടിൽ ഒളിവിൽ കഴിയുകയായിരുന്ന പ്രതിയെ ഇന്നലെയാണ് എസ്ഐ മധു മൂത്തേടത്തിന്റെ നേതൃത്വത്തിലുള്ള പോലീസ് കസ്‌റ്റഡിയിൽ എടുത്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്‌തു.
Malabar News: പാണ്ടിക്കാട് പോക്‌സോ കേസ്; യുവതിയടക്കം മൂന്ന് പേർ കൂടി അറസ്‌റ്റിൽ
