മലപ്പുറത്തിനെതിരെ അധിക്ഷേപവുമായി പൊന്നാന്നി മുൻ എംഎൽഎ പി. നന്ദകുമാർ
മലപ്പുറം മതമൗലിക വർഗീയവാദികളുടെ കൂടാണെന്ന വിവാദ പരാമർശവുമായി മുൻ പൊന്നാനി എംൽഎ പി. നന്ദകുമാർ (2021-2026) സിപിഎം മലപ്പുറം ജില്ലാവിപുലീകൃത കമ്മിറ്റിയുടെ പ്രതിനിധി സമ്മേളനത്തിൽ.
പി. നന്ദകുമാർ / Image courtesy: FB/NandakumarOfficial | Cropped by Team MN
മലപ്പുറം: സിപിഎം മലപ്പുറം ജില്ലാവിപുലീകൃത കമ്മിറ്റിയുടെ പ്രതിനിധി സമ്മേളനത്തിൽ വെച്ചാണ് സിപിഎമ്മിന്റെ മുതിർന്ന നേതാവും പൊന്നാനി മുൻ എംൽഎയുമായ പി. നന്ദകുമാർ മലപ്പുറത്തിനെതിരെ വിദ്വേഷ പരാമർശം നടത്തിയത്. മത മൗലിക വർഗീയ വാദികളുടെ കൂടാണ് മലപ്പുറമെന്നായിരുന്നു പി. നന്ദകുമാറിന്റെ പരാമർശം.
”മലപ്പുറം ജില്ലയെ സംബന്ധിച്ചിടത്തോളം സവിശേഷമായ പല സാഹചര്യങ്ങളുമുണ്ട്. മതമൗലിക വർഗീയ വാദികളുടെ കൂടാണ് മലപ്പുറം ജില്ല. സ്വാഭാവികമായും അതിനെ പ്രതിരോധിച്ച് മതനിരപേക്ഷ പ്രസ്‌ഥാനങ്ങളെ യോജിപ്പിച്ച് മുന്നോട്ടുകൊണ്ടുപോകുന്ന കമ്യൂണിസ്‌റ്റ് പാർട്ടി, പുതിയ കാലത്ത് അതിന്റെ രാഷ്‌ട്രീയ കടമകൾ എങ്ങനെ ഏറ്റെടുക്കണമെന്ന് പരിശോധിക്കണം. അതിനായാണ് വിപുലീകൃത ജില്ലാകമ്മിറ്റി യോഗം ചേരുന്നത്- നന്ദകുമാർ പറഞ്ഞു”.
സമ്മേളനത്തിൽ സ്വാഗത പ്രസംഗം നടത്തുകയായിരുന്നു നന്ദകുമാർ. പ്രതിപക്ഷ നേതാവ് പിണറായി വിജയൻ, കെകെ ശൈലജ അടക്കമുള്ള മുതിർന്ന നേതാക്കൾ വേദിയിൽ ഇരിക്കവേയാണ് നന്ദകുമാറിന്റെ അധിക്ഷേപ പരാമർശം ഉണ്ടായത്.
അതേസമയം, നിയമസഭാ തിരഞ്ഞെടുപ്പിൽ സിപിഎം മലപ്പുറത്ത് നേരിട്ടത് വലിയ തിരിച്ചടിയാണെന്നും സ്വാധീന മേഖലയായ പൊന്നാനി (നിലവിൽ യുഡിഎഫിൽ നിന്നുള്ള കെപി നൗഷാദലിയാണ് പൊന്നാനി എംഎൽഎ) ഉൾപ്പടെ കൈവിട്ടുപോയെന്നും യോഗത്തിൽ വിമർശനം ഉയർന്നു.
സ്‌ഥാനാര്‍ഥി നിര്‍ണയത്തില്‍ ഉള്‍പ്പടെ പരാജയം ഉണ്ടായെന്നും മന്ത്രിയായിരുന്ന അബ്‌ദുറഹ്‌മാൻ മണ്ഡലം മാറി മല്‍സരിച്ചതുള്‍പ്പടെയുള്ള വിഷയങ്ങൾ താഴെത്തട്ടിലുള്ള പ്രവര്‍ത്തകര്‍ വിമര്‍ശനമായി ഉന്നയിക്കുന്നുണ്ടെന്നും യോഗത്തിൽ വിമര്‍ശനം ഉയര്‍ന്നു.
അതിനിടെ, വിദ്വേഷ പരാമർശം നടത്തിയ പി നന്ദകുമാറിനെതിരെ യൂത്ത് ലീഗ് പൊന്നാനി മുനിസിപ്പൽ കമ്മിറ്റി പോലീസിൽ പരാതി നൽകി. മതസ്‌പർധ ഉണ്ടാക്കുന്നതും കേരളത്തിന്റെ മതസൗഹാർദ അന്തരീക്ഷം തകർക്കുന്നതുമാണ് പരാമർശമെന്നാണ് യൂത്ത് ലീഗ് ആരോപിക്കുന്നത്.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
