ബെംഗളൂരു : കോവിഡ് വ്യാപനം രൂക്ഷമായ സാഹചര്യത്തിൽ കർണാടകയിലെ ദക്ഷിണ കന്നഡ ജില്ലയിൽ നിരോധനാജ്‌ഞ പ്രഖ്യാപിച്ചു. കർണാടകയിലെ അതിർത്തി ജില്ലയാണ് ദക്ഷിണ കന്നഡ. ഇവിടങ്ങളിൽ ആൾക്കൂട്ടം നിയന്ത്രിച്ച് കോവിഡ് വ്യാപനം കുറക്കുന്നതിന് വേണ്ടിയാണ് ഇപ്പോൾ നിരോധനാജ്‌ഞ പ്രഖ്യാപിച്ചിരിക്കുന്നത്.
നിലവിൽ കോവിഡ് കേസുകളിൽ രാജ്യത്ത് 5 മടങ്ങ് വർധന ഉണ്ടായെന്നാണ് ആരോഗ്യമന്ത്രാലയം ഇന്ന് പുറത്തുവിട്ട കണക്കുകൾ സൂചിപ്പിക്കുന്നത്. രാജ്യത്ത് ഇപ്പോൾ ഏറ്റവും കൂടുതൽ കോവിഡ് രോഗികളുള്ളത് പൂനെ, നാഗ്‌പൂർ, മുംബൈ ജില്ലകളിലാണ്. കൂടാതെ കോവിഡ് വ്യാപനം ഏറ്റവും കൂടുതൽ മഹാരാഷ്‌ട്രയിലാണ്. 23 ശതമാനമാണ് ഇവിടുത്തെ കോവിഡ് പോസിറ്റിവിറ്റി നിരക്ക്. നിലവിൽ മഹാരാഷ്‌ട്രയിലെ 8 ജില്ലകളാണ് കോവിഡ് തീവ്രബാധിത മേഖലയിൽ ഉൾപ്പെടുന്നത്.
കോവിഡ് വ്യാപനം കുറക്കുന്നതിനായി എല്ലാ സംസ്‌ഥാനങ്ങളിലും കോവിഡ് പരിശോധനകൾ വർധിപ്പിക്കണമെന്ന് ആരോഗ്യമന്ത്രാലയം നിർദേശം നൽകിയിട്ടുണ്ട്. ഒപ്പം തന്നെ രോഗികൾ കൂടുതലുള്ള ജില്ലകളിൽ കോവിഡ് വാക്‌സിനേഷൻ കൂട്ടണമെന്നും, ഇതിനായി 45 വയസിന് മുകളിലുള്ളവർ കോവിഡ് വാക്‌സിൻ സ്വീകരിക്കുന്നതിനായി രജിസ്‌റ്റർ ചെയ്യണമെന്നും അധികൃതർ നിർദേശിച്ചു.
Read also : ആർബിഐയുടെ പുതിയ നിയമം ഉടൻ; ബിൽ പേയ്‌മെന്റുകൾ തടസപ്പെട്ടേക്കാം
