തിരുവനന്തപുരം: ദേശീയ പണിമുടക്കിന്റെ രണ്ടാം ദിവസമായ ഇന്നും സെക്രട്ടറിയേറ്റ് സ്തംഭിച്ചു. 4.15 ശതമാനം ജീവനക്കാർ മാത്രമാണ് ഇന്ന് ജോലിക്കായി എത്തിയത്. ഡയസ്നോൺ പ്രഖ്യാപിച്ചിട്ടും സെക്രട്ടറിയേറ്റിൽ ആകെയുള്ള 4828 ജീവനക്കാരിൽ 212 പേർ മാത്രമാണ് ഇന്ന് ജോലിയിൽ ഹാജരായത്. പൊതുഭരണ വകുപ്പിൽ 188 പേർ, ഫിനാൻസ് വകുപ്പിൽ 22, നിയമവകുപ്പിൽ ഒരാൾ എന്നിങ്ങനെയാണ് ഇന്ന് രേഖപ്പെടുത്തിയ ഹാജർ നില.
ദേശീയ പണിമുടക്കിന്റെ ഒന്നാം ദിവസമായ ഇന്നലെ 32 പേര് മാത്രമാണ് ജോലിക്കെത്തിയത്. മറ്റു സർക്കാർ സ്ഥാപനങ്ങളിലും ഹാജർ നില തീരെ കുറവാണ്. ഹൈക്കോടതി നിർദ്ദേശ പ്രകാരം പണിമുടക്കിൽ പങ്കെടുക്കുന്നത് തടഞ്ഞു സർക്കാർ ഉത്തരവ് ഇറക്കിയത് ജീവനക്കാരുടെ സംഘടനകൾ മുഖവിലക്ക് എടുത്തില്ലെന്നാണ് ഇന്നത്തെ ഹാജർനില വ്യക്തമാക്കുന്നത്.
അനിവാര്യ കാരണമില്ലാതെ അവധി അനുവദിക്കില്ലെന്നും, അനധികൃതമായി ഹാജരാകാതിരുന്നാൽ ശമ്പളം നഷ്ടപ്പെടുമെന്നും ഉത്തരവിൽ വ്യക്തമാക്കിയിരുന്നെങ്കിലും ജോലിക്ക് ഹാജരാകേണ്ടെന്ന നിർദ്ദേശമാണ് സർവീസ് സംഘടനകൾ നൽകിയത്. ഭരണ, പ്രതിപക്ഷ അനുകൂല ട്രേഡ് യൂണിയനുകള് പണിമുടക്കില് പങ്കെടുത്തതിനാലാണ് ഹാജര് നില ഗണ്യമായി കുറഞ്ഞത്.
Most Read: മുസ്ലിം ഭരണാധികാരികളെ കുറിച്ചുള്ള പാഠഭാഗങ്ങൾ വെട്ടിച്ചുരുക്കാൻ ഒരുങ്ങി കർണാടക
