ന്യൂഡെല്ഹി: കേന്ദ്ര സര്ക്കാര് പാസാക്കിയ കാര്ഷിക നിയമങ്ങള് പിന്വലിക്കാത്തതിനും കര്ഷകരുടെ ആവശ്യങ്ങള് അംഗീകരിക്കാത്തതിനും പ്രധാനമന്ത്രി നരേന്ദ്ര മോദിക്കെതിരെ ആഞ്ഞടിച്ച് കോണ്ഗ്രസ് നേതാവ് രാഹുല് ഗാന്ധി. മുതലാളിത്ത ശക്തികളെ ഉപേക്ഷിച്ച് കര്ഷകരെ പിന്തുണക്കാന് രാഹുല് ഗാന്ധി നരേന്ദ്ര മോദിയോട് ആവശ്യപ്പെട്ടു. ട്വിറ്ററിലൂടെ ആയിരുന്നു കോണ്ഗ്രസ് നേതാവിന്റെ പ്രതികരണം.
”ഇനിയും സമയമുണ്ട്, മുതലാളികളെ വിട്ട് അന്നദാതാക്കളെ പിന്തുണക്കുക,’ രാഹുല് ഗാന്ധി ട്വീറ്റ് ചെയ്തു. കൂടാതെ 2018 ഏപ്രിലില് ലോകസഭയില് കര്ഷകരെച്ചൊല്ലി കേന്ദ്രസര്ക്കാരിനെ വിമര്ശിച്ച് താന് നടത്തിയ പ്രസംഗത്തില് നിന്നുള്ള വീഡിയോയും അദ്ദേഹം പങ്കുവച്ചു.
अब भी वक़्त है मोदी जी, अन्नदाता का साथ दो, पूँजीपतियों का साथ छोड़ो! pic.twitter.com/yztDVwokWZ
— Rahul Gandhi (@RahulGandhi) January 10, 2021
അതേസമയം വിവാദ കാര്ഷിക നിയമങ്ങള് പിന്വലിക്കണം എന്നാവശ്യപ്പെട്ടുള്ള കര്ഷകരുടെ പ്രതിഷേധം ശക്തമായി രാജ്യത്ത് തുടരുകയാണ്. ജനുവരി എട്ടിന് കേന്ദ്രം കര്ഷക നേതാക്കളുമായി ചര്ച്ച നടത്തിയിരുന്നു എങ്കിലും പതിവുപോലെ എട്ടാം വട്ട ചര്ച്ചയും ഫലം കണ്ടില്ല. നിയമം പിന്വലിക്കണമെന്ന നിലപാടില് കര്ഷകരും പിന്വലിക്കില്ലെന്ന നിലപാടില് കേന്ദ്രവും ഉറച്ചുനിന്നതോടെയാണ് ചര്ച്ച എങ്ങുമെത്താതെ പോയത്. നിയമം പിന്വലിക്കാത്ത പക്ഷം സമരം കടുപ്പിക്കാനാണ് കര്ഷകരുടെ തീരുമാനം.
Read Also: വാക്സിൻ വിതരണത്തിന് 133 കേന്ദ്രങ്ങൾ; ഗർഭിണികളെയും മുലയൂട്ടുന്നവരെയും ഒഴിവാക്കും