വയനാട്: ജില്ലയിലെ ചീയമ്പം എഴുപത്തിമൂന്ന് കോളനിയിൽ ആടിനെ കടിച്ചുകൊന്ന് കടുവ. പട്ടാപ്പകലാണ് കോളനിയിൽ മേയാൻ വിട്ടിരുന്ന ആടിനെ കടുവ കടിച്ചുകൊന്നത്. കോളനിക്കാര്‍ ഓടിക്കൂടി ബഹളമുണ്ടാക്കിയതിനാല്‍ ആടിന്റെ ജഡമുപേക്ഷിച്ച് കടുവ കാട് കയറുകയായിരുന്നു.
സംഭവത്തിന് പിന്നാലെ വനപാലകർ എത്തി സ്‌ഥലത്ത് ക്യാമറ സ്‌ഥാപിച്ചിട്ടുണ്ട്. കൂടാതെ ഉടമക്ക് നഷ്‌ടപരിഹാരം നൽകുമെന്ന് ഉറപ്പും നൽകിയിട്ടുണ്ട്. പ്രദേശത്തെ ആനപ്പന്തി കോളനിയും നിലവിൽ കടുവ ഭീതിയിലാണ്. ഏതാനും ദിവസങ്ങൾക്കുള്ളിലാണ് വീട്ടുമുറ്റത്ത് കെട്ടിയ ആടിനെ കടുവ ആക്രമിച്ചത്. കൂടാതെ കഴിഞ്ഞ കുറച്ചു ദിവസങ്ങൾക്കുള്ളിൽ 4 ആടുകളെ കടുവ ആക്രമിച്ചു കൊല്ലുകയും ചെയ്‌തിട്ടുണ്ട്‌.
നിലവിൽ വനപാതകളിൽ കൂടി നടക്കാൻ ആളുകൾക്ക് ഭയമാണ്. ഒപ്പം തന്നെ കടുവ ഭീതിയിൽ ജോലിക്ക് പോലും പുറത്തേക്ക് പോകാൻ കഴിയാത്ത സ്‌ഥിതിയാണ്‌ നിലവിലെന്ന് കോളനി നിവാസികൾ വ്യക്‌തമാക്കുന്നുണ്ട്. കൂട് സ്‌ഥാപിച്ച് കടുവയെ പിടികൂടണമെന്നാണ് നിലവിൽ ആളുകൾ ഉന്നയിക്കുന്ന ആവശ്യം.
Read also: ജാനകിക്കാട് കൂട്ടബലാൽസംഗം; കൂടുതൽ വെളിപ്പെടുത്തലുമായി പെൺകുട്ടി
