ഇന്ന് മിക്കവരെയും അലട്ടുന്ന ഒരു പ്രധാന പ്രശ്‌നമാണ് അകാലനര. മുപ്പതു വയസാകും മുന്നേ വെളുത്ത മുടികൾ പ്രത്യക്ഷപ്പെടുന്നത് പലരെയും ആശങ്കയിലേക്ക് തള്ളിവിടും. രോഗാവസ്‌ഥകൾ, കാലാവസ്‌ഥ, മലിനീകരണം, ജീവിതശൈലി, ജനിതകപരമായ കാരണങ്ങൾ എന്നിങ്ങനെ പലതും അകാലനരയ്‌ക്ക് കാരണമായേക്കാം.
രോഗാവസ്‌ഥയും ജനിതകവുമായ കാരണങ്ങളും മൂലം അല്ലാതെയുള്ള അകാല നര തടയാൻ ചില എണ്ണകൾ സഹായിക്കും. വീട്ടിൽ തന്നെ എളുപ്പത്തിൽ തയ്യാറാക്കാവുന്ന അത്തരം ചില പ്രകൃതിദത്ത എണ്ണകൾ പരിചയപ്പെടാം:
കറിവേപ്പില ഉത്തമം
5 ടേബിൾ സ്‌പൂൺ വെളിച്ചെണ്ണ എടുത്ത് അതിൽ ഒരു കൈ നിറയെ കറിവേപ്പില ഇട്ട് ചൂടാക്കുക. വേപ്പിലെ കറുത്ത നിറം ആകുന്നതു വരെ ചൂടാക്കാം. ചൂടാറിയശേഷം എണ്ണ തലയിൽ തേച്ചു പിടിപ്പിക്കുക. 30 മിനിറ്റിനുശേഷം ഷാംപൂവും കണ്ടീഷനറും ഉപയോഗിച്ച് കഴുകിക്കളയാം. ഇത് മുടി വേഗം വളരാനും കറുപ്പ് നിറം നിലനിർത്താനും സഹായിക്കും.
നെല്ലിക്കാ പൊടിയുണ്ടോ?
നാലു സ്‌പൂൺ വെളിച്ചെണ്ണയിൽ രണ്ട് ടീസ്‌പൂൺ നെല്ലിക്ക പൊടിച്ചത് ഇട്ടു ചൂടാക്കുക. ഇളംചൂടോടെ ഈ മിശ്രിതം തലയിൽ തേച്ചുപിടിപ്പിക്കാം. ശേഷം ഷാംപൂവും കണ്ടീഷനറും ഉപയോഗിച്ച് കഴുകിക്കളയാം. നെല്ലിക്ക പുതിയതായി വരുന്ന മുടിയിഴകൾക്ക് കറുപ്പ് നിറം ലഭിക്കാനും വെളിച്ചെണ്ണ കരുത്തോടെ മുടി വളരാനും സഹായിക്കുന്നു.
ചെമ്പരത്തിയും വെളിച്ചെണ്ണയും
നാല് സ്‌പൂൺ വെളിച്ചെണ്ണ ചൂടായി വരുമ്പോൾ അതിലേക്ക് മൂന്നോ നാലോ ചെമ്പരത്തിയുടെ ഇല ഇടുക. എണ്ണ നന്നായി തണുത്തശേഷം മുടിയിൽ പുരട്ടുക. അര മണിക്കൂർ കഴിഞ്ഞു ഷാംപൂ, കണ്ടീഷനർ എന്നിവ ഉപയോഗിച്ച് കഴുകിക്കളയാം. ഇത് മുടിയുടെ കരുത്ത് വർധിപ്പിക്കുകയും മുടി പൊട്ടുന്നത് തടയുകയും ചെയ്യും.
കരിംജീരകം- ഒലിവ് ഓയിൽ
ഒരു ടേബിൾ സ്‌പൂൺ കരിംജീരക എണ്ണയും ഒരു ടേബിൾ സ്‌പൂൺ ഒലിവ് എണ്ണയും മിക്‌സ് ചെയ്‌ത്‌ തലയിൽ പുരട്ടാം. ഒരു മണിക്കൂറിനുശേഷം ഷാംപൂ, കണ്ടീഷനർ എന്നിവ ഉപയോഗിച്ച് കഴുകിക്കളയാം. ആഴ്‌ചയിൽ രണ്ടുതവണ ഇത് ആവർത്തിക്കാം. അകാലനര തടയാനും മുടി ബലപ്പെടുത്താനും ഈ എണ്ണ സഹായിക്കും.
അതേസമയം കരിംജീരക എണ്ണ ചിലരിൽ ചൊറിച്ചിൽ ഉണ്ടാക്കാൻ സാധ്യത ഉള്ളതിനാൽ പാച്ച് ടെസ്‌റ്റ് നടത്തിയശേഷം മാത്രമെ ഉപയോഗിക്കാൻ പാടുള്ളു.
Most Read: സണ്ണി വെയ്ൻ നായകനായി ‘അപ്പൻ’; കൗതുകമുണർത്തി ടൈറ്റിൽ പോസ്‌റ്റർ
