കീവ്: റഷ്യ- യുക്രൈൻ യുദ്ധം ഒൻപതാം ദിവസത്തിലേക്ക് കടക്കുമ്പോഴും ആക്രമണം കടുപ്പിച്ച് റഷ്യ. ഒഡെസ മേഖലയിൽ ഏറ്റുമുട്ടൽ തുടരുകയാണ്. ഈ മേഖലയിൽ റഷ്യൻ വിമാനം വെടിവച്ചിട്ടതായി യുക്രൈൻ പ്രതിരോധ മന്ത്രാലയം അറിയിച്ചു. ചെർണിവിൽ റഷ്യൻ വ്യോമാക്രമണത്തിൽ 33 പേർ കൊല്ലപ്പെട്ടതായാണ് വിവരം. രണ്ട് സ്കൂളുകളും തകർന്നിട്ടുണ്ട്.
റഷ്യ- യുക്രൈൻ രണ്ടാംവട്ട ചർച്ചയിലും സമവായം കണ്ടെത്താൻ കഴിഞ്ഞിട്ടില്ല. സൈനിക പിൻമാറ്റം ഉൾപ്പടെയുള്ള കാര്യങ്ങളിൽ രണ്ടാം വട്ട ചർച്ചയിൽ ധാരണയായില്ല. മൂന്നാംവട്ട സമാധാന ചർച്ച ഉടൻ നടത്താനും തീരുമാനമായെന്ന് യുക്രൈൻ അറിയിച്ചു.
അതേസമയം, തീവ്ര യുദ്ധമേഖലയായ ഖാർക്കിവിലെ ഇന്ത്യക്കാരെ പുറത്തിറക്കാൻ നിർണായക ഇടപെടൽ നടത്തിയിരിക്കുകയാണ് പ്രതിരോധ മന്ത്രാലയം. നേരിടേണ്ടി വന്നേക്കാവുന്ന സാഹചര്യങ്ങൾ വിശദീകരിച്ചുകൊണ്ട് മന്ത്രാലയം മാർഗനിർദ്ദേശം പുറത്തിറക്കി.
വിവരങ്ങൾ കൂടെയുള്ളവരുമായി പങ്കുവെക്കണം, പരിഭ്രാന്തരാകരുത്, വാട്ട്സ് ആപ്പ് ഗ്രൂപ്പുണ്ടാക്കി വിവരങ്ങൾ ക്രോഡീകരിക്കുക, കൺട്രോൾ റൂമുമായി ലൊക്കേഷൻ പങ്കുവെക്കുക തുടങ്ങിയവയാണ് നിർദ്ദേശങ്ങൾ. ഒരു നേതാവ് ഉൾപ്പടെ പത്ത് സംഘങ്ങൾ ആകണമെന്നും മന്ത്രാലയം നിർദ്ദേശിച്ചിട്ടുണ്ട്.
Most Read: മീ ടു ആരോപണം; പരാതി ലഭിച്ചാലുടൻ ടാറ്റൂ കലാകാരനെതിരെ കേസെടുക്കുമെന്ന് കമ്മീഷണർ