തിരുവനന്തപുരം: നിയമസഭാ തിരഞ്ഞെടുപ്പ് കാലത്ത് പരസ്യ പ്രതികരണങ്ങൾ ഇനി പാടില്ലെന്ന് കോൺഗ്രസ് നേതാക്കൾക്ക് ഹൈക്കമാൻഡിന്റെ വിലക്ക്. പരസ്യ പ്രസ്‌താവനകൾ പാർട്ടിയുടെ സാധ്യതകളെ ബാധിക്കുമെന്ന വിലയിരുത്തലിന്റെ അടിസ്‌ഥാനത്തിലാണ് എഐസിസി നടപടി.
അഭിപ്രായ വ്യത്യാസങ്ങൾ രേഖപ്പെടുത്താൻ പാർട്ടി വേദികൾ ഉപയോഗപ്പെടുത്താൻ എഐസിസി നിർദേശിച്ചു. നിർദേശം ലംഘിച്ചാൽ സംസ്‌ഥാനതല അച്ചടക്ക സമിതി തീരുമാനമെടുക്കണമെന്നും ഹൈക്കമാൻഡ് നിർദേശം നൽകിയിട്ടുണ്ട്.
സ്‌ഥാനാർഥി പട്ടിക പുറത്തു വന്നതിന് പിന്നാലെ, അതൃപ്‌തിയുമായി പാർട്ടിയിലെ ഏറ്റവും മുതിർന്ന നേതാക്കളടക്കം രംഗത്തു വന്നതാണ് ഹൈക്കമാൻഡിനെ പ്രതിരോധത്തിലാക്കിയത്. ഹൈക്കമാൻഡിനെ അടക്കം വിമർശിച്ചുള്ള കെ സുധാകരന്റെ കടന്നാക്രമണം ഭരണം തിരിച്ച് പിടിക്കാനൊരുങ്ങുന്ന കോൺഗ്രസിനെ കടുത്ത വെട്ടിലാക്കിയിരുന്നു.
