കോഴിക്കോട്: തിരഞ്ഞെടുപ്പു സാമഗ്രികളുമായി ഉദ്യോഗസ്‌ഥർ ഇന്ന് ബൂത്തുകളിലേക്ക് നീങ്ങും. ജില്ലയിൽ 2,987 ബൂത്തുകളാണുള്ളത്. അവയിലേക്കു തിരഞ്ഞെടുപ്പു സാമഗ്രികൾ വിതരണം ചെയ്യാനായി സജ്‌ജീകരിച്ച 20 കേന്ദ്രങ്ങളിൽ സാമഗ്രികൾ എത്തിയിട്ടുണ്ട്. ഇന്നു രാവിലെ 7 മുതൽ പ്രിസൈഡിങ് ഓഫിസർമാർ ബന്ധപ്പെട്ട വിതരണ കേന്ദ്രത്തിലെത്തി അവരുടെ ബൂത്തിലേക്കുള്ള സാമഗ്രികൾ കൈപ്പറ്റും.
പഞ്ചായത്ത് പ്രദേശത്ത് 2,309 ബൂത്തുകളാണുള്ളത്. അവിടെ ഓരോ ബൂത്തിലും 3 വീതം വോട്ടിങ് യന്ത്രം ഉണ്ടാകും. നഗരസഭാ പ്രദേശത്ത് 280 ബൂത്തുകളും കോർപറേഷനിൽ 398 ബൂത്തുകളുമാണ് ഉള്ളത്. അവിടങ്ങളിൽ ഒന്നു വീതമാണ് വോട്ടിങ് യന്ത്രം. മുനിസിപ്പാലിറ്റി, കോർപറേഷൻ പ്രദേശത്തേക്ക് 20 ശതമാനവും പഞ്ചായത്തു പ്രദേശങ്ങളിലേക്ക് 2 ശതമാനവും വോട്ടിങ് യന്ത്രം കരുതലായി സൂക്ഷിക്കുന്നുണ്ട്.
ആകെ 91 തദ്ദേശ സ്‌ഥാപങ്ങളിലേക്കായി 5985 സ്‌ഥാനാർഥികളാണ് നാളെ ജനവിധി തേടുന്നത്. കോർപറേഷൻ, ജില്ലാ പഞ്ചായത്ത്, 7 നഗരസഭകൾ, 12 ബ്ളോക്ക് പഞ്ചായത്തുകൾ, 70 പഞ്ചായത്തുകൾ എന്നിങ്ങനെയാണ് തദ്ദേശ സ്‌ഥാപനങ്ങളുടെ എണ്ണം. 2,987 ബൂത്തുകളിലായി ആകെ 25.33 ലക്ഷം വോട്ടർമാരാണുള്ളത്.
Read Also: 11 മാസത്തെ ശമ്പള കുടിശിക കിട്ടിയില്ല; ആറുവരിപ്പാത നിർമ്മാണം തടഞ്ഞ് ജീവനക്കാർ
