ന്യൂഡല്ഹി: കോവിഡ് പശ്ചാത്തലത്തില് ഉണ്ടായ സാമ്പത്തികമാന്ദ്യം പരിഹരിക്കാന് പുതിയ ഉത്തേജക പാക്കേജ് പ്രഖ്യാപിക്കാനൊരുങ്ങി കേന്ദ്രം. മാസ ശമ്പളക്കാരല്ലാത്ത മധ്യവര്ഗ്ഗത്തെയും ചെറുകിട, ഇടത്തരം ബിസിനസുകാരെയുമാണ് ഈ പാക്കേജ് വഴി ലക്ഷ്യമിട്ടിരിക്കുന്നത്.
മേയില് പ്രഖ്യാപിച്ച 20 കോടി രൂപയുടെ ആത്മനിര്ഭര് പാക്കേജ് പ്രധാനമായും വളരെ പാവപ്പെട്ടവരെയും സംഘടിത മേഖലയിലുള്ളവരെയും ചെറുകിട ഇടത്തരം സംരംഭങ്ങളെയും ഉദ്ദേശിച്ചുകൊണ്ടുള്ളതായിരുന്നു. എന്നാല്, ഈ വിഭാഗങ്ങളില് ഉള്പ്പെടാത്ത ശമ്പളക്കാരും മധ്യവര്ഗ്ഗക്കാരും ഇടത്തരം കച്ചവടക്കാരും കോവിഡ് മൂലം പ്രതിസന്ധിയിലാണ്. ഈ പ്രതിസന്ധി മറികടക്കാനും ഇത്തരം വിഭാഗങ്ങളെ ഉയര്ത്തിക്കൊണ്ട് വരാനുമാണ് പുതിയ പാക്കേജിലൂടെ ഉദ്ദേശിക്കുന്നത്.
ഇന്ത്യയുടെ ജിഡിപി സാമ്പത്തിക വര്ഷത്തിന്റെ ആദ്യപാദമായ ഏപ്രില്-ജൂണ് മാസങ്ങളില് 23.9 ശതമാനമായി കുറഞ്ഞിരുന്നു. ലോക്ക് ഡൗണ് കാരണം സമ്പദ് വ്യവസ്ഥ പിന്നോക്കം പോകുമെന്ന് പ്രതീക്ഷിച്ചിരുന്നെങ്കിലും ജിഡിപി യില് പ്രതീക്ഷകള്ക്കുമപ്പുറമുള്ള ആഘാതമാണ് ഉണ്ടായത്. ജൂലൈ-സെപ്റ്റംബര് പാദത്തിലും ഇത് തുടരാന് സാധ്യതയുണ്ട്.
സാമ്പത്തികരംഗം വീണ്ടും താഴേക്ക് പോകാതിരിക്കാന് ഏതാനും മേഖലകള്ക്ക് സഹായം അനിവാര്യമാണെന്ന് പ്രധാനമന്ത്രിയുടെ അധ്യക്ഷതയില് ചേര്ന്ന യോഗം വിലയിരുത്തിയിരുന്നു. സാമ്പത്തികകാര്യ സമിതി അംഗങ്ങളും, നീതി ആയോഗ് പ്രതിനിധികളും, ധന-വാണിജ്യ മന്ത്രാലയത്തിലെ ഉന്നതരും യോഗത്തില് പങ്കെടുത്തു.
കോവിഡ് വ്യാപനം തുടരുന്ന സാഹചര്യത്തില് സാമ്പത്തിക പ്രവര്ത്തനങ്ങള് മുന്നോട്ട് പോകേണ്ടത് അനിവാര്യമായതിനാലാണ് പല തവണയായി അണ്ലോക്ക് പ്രക്രിയ നടപ്പാക്കിയത്. ഇതിനെ തുടര്ന്ന് ഇനിയുള്ള മാസങ്ങളില് സാമ്പത്തിക വളര്ച്ചയില് വ്യത്യാസമുണ്ടാകുമെന്നാണ് പ്രതീക്ഷ.