ഭോപ്പാല്‍: മധ്യപ്രദേശിലെ 28 സീറ്റുകളിലേക്കുള്ള തിരഞ്ഞെടുപ്പ് ഇന്ന്. കഴിഞ്ഞ നിയമസഭാ തിരഞ്ഞെടുപ്പില്‍ ബിജെപിയുടെ 15 വര്‍ഷം നീണ്ട ഭരണം അവസാനിപ്പിച്ചാണ് കമല്‍നാഥിന്റെ നേതൃത്വത്തില്‍ കോണ്‍ഗ്രസ് സര്‍ക്കാര്‍ മധ്യപ്രദേശില്‍ അധികാരത്തില്‍ വന്നത്. എന്നാല്‍ കമല്‍നാഥിനോട് ഉടക്കി ജ്യോതിരാദിത്യ സിന്ധ്യയും അണികളും കോണ്‍ഗ്രസ് വിട്ട് ബിജെപിയില്‍ ചേര്‍ന്നതോടെ ഉപതിരഞ്ഞെടുപ്പിന് കളമൊരുങ്ങി.
22 എംഎല്‍എമാരാണ് സിന്ധ്യക്കൊപ്പം ബിജെപിയില്‍ ചേര്‍ന്നത്. അത്തരത്തില്‍ കോണ്‍ഗ്രസിന് അഭിമാന പോരാട്ടം മാത്രമല്ല വീണ്ടും അധികാരത്തില്‍ തിരിച്ചെത്താനുളള അവസരം കൂടിയാണ് ഈ തിരഞ്ഞെടുപ്പ്.
ജ്യോതിരാദിത്യ സിന്ധ്യക്ക് വലിയ സ്വാധീനമുളള ഗ്വാളിയോര്‍-ചമ്പാരന്‍ മേഖലയില്‍ ആണ് നിര്‍ണായകമായ 16 സീറ്റുകള്‍. അത് തന്നെയാണ് ബിജെപിക്ക് പ്രതീക്ഷ വര്‍ധിപ്പിക്കുന്നതും. ഈ മേഖല കേന്ദ്രീകരിച്ച് കോണ്‍ഗ്രസും ശക്‌തമായ പ്രചാരണം തന്നെ നടത്തിയിട്ടുണ്ട്. തന്റെ മന്ത്രിസഭയെ താഴെ ഇറക്കിയതിന് ബിജെപിയോടും സിന്ധ്യയോടുമുള്ള പകരം വീട്ടല്‍ കൂടിയാണ് കമല്‍ നാഥിന് ഈ തിരഞ്ഞെടുപ്പ്.
Read also: ബിജെപിയെ പിന്തുണക്കില്ല; അമിത് ജോഗിക്കെതിരെ വിമത എംഎല്‍എമാര്‍
