ന്യൂഡെൽഹി: രാജ്യത്തെ ഏറ്റവും വലിയ പൊതുമേഖലാ ബാങ്കായ എസ്ബിഐ (സ്റ്റേറ്റ് ബാങ്ക് ഓഫ് ഇന്ത്യ) 75ആം സ്വാതന്ത്ര്യ ദിനത്തോട് അനുബന്ധിച്ച് നിരവധി ആകർഷകമായ ഓഫറുകളാണ് പ്രഖ്യാപിച്ചത്. ഉപഭോക്താക്കൾക്ക് ഏറെ ഗുണകരമാവുന്ന ഓഫറുകളാണ് ഇവയിൽ കൂടുതലും. ഭവന-വാഹന വായ്പകൾക്കും, നിക്ഷേപത്തിനും പ്രാധാന്യം നൽകുന്ന ഓഫറുകളും ഇക്കൂട്ടത്തിലുണ്ട്.
പുതിയ തീരുമാന പ്രകാരം ഭവന-വാഹന വായ്പകൾക്ക് പ്രൊസസിങ് ഫീസ് ഒഴിവാക്കി. വാഹനവിലയുടെ 90 ശതമാനം വരെ വായ്പയും അനുവദിക്കും. ‘യോനോ ആപ്പ്’ വഴി കാർ ലോണിന് അപേക്ഷിച്ചാൽ പലിശ നിരക്കിൽ കാൽ ശതമാനം കിഴിവ് നൽകും. 7.5 ശതമാനം മുതലാണ് വാഹന വായ്പക്ക് ബാങ്ക് ഈടാക്കുന്ന പലിശ.
75ആം വാർഷികം പ്രമാണിച്ച് സ്ഥിര നിക്ഷപത്തിന് അധിക പലിശയും ബാങ്ക് വാഗ്ദാനം ചെയ്തിട്ടുണ്ട്. 75 ദിവസം, 75 ആഴ്ച, 75 മാസം എന്നീ കാലയളവിലുള്ള നിക്ഷേപങ്ങൾക്ക് നിലവിലുള്ള പലിശയേക്കാൾ 15 ബേസിസ് പോയന്റ് അധികം ലഭിക്കും. ഓഗസ്റ്റ് 15 മുതൽ സെപ്റ്റംബര് 14 വരെയുള്ള കാലയളവിൽ നിക്ഷേപം നടത്തിയാലാണ് അധിക പലിശ ലഭിക്കുക.
സ്വർണ പണയ വായ്പയുടെ പലിശയിൽ 0.75 ശതമാനം കുറവും പ്രഖ്യാപിച്ചിട്ടുണ്ട്. യോനോ ആപ്പ് വഴി ഗോൾഡ് ലോണിന് അപേക്ഷിച്ചാൽ പ്രൊസസിങ് ഫീസ് ഒഴിവാക്കി നൽകും. 7.5 ശതമാനം മുതലാണ് ഗോൾഡ് ലോണിന് എസ്ബിഐ ഈടാക്കുന്ന പലിശയുടെ നിരക്ക്.
Read Also: പ്ളസ് വൺ പ്രവേശനത്തിന് 10 ശതമാനം സാമ്പത്തിക സംവരണം