മലപ്പുറം: ലക്ഷദ്വീപിന്റെ സാംസ്കാരിക അസ്ഥിത്വം നശിപ്പിച്ച് ദ്വീപ് ജനതയുടെ ജീവിതം ദുസഹമാക്കുന്ന അഡ്മിനിസ്ട്രേറ്ററുടെ തെറ്റായ നയങ്ങളിൽ പ്രതിഷേധിച്ചാണ് എസ്വൈഎസ്, ലക്ഷദ്വീപ് ദിനാചരണം സംഘടിപ്പിച്ചത്. ദിനാചരണത്തിന്റെ ഭാഗമായി രാജ്യത്താകമാനം നടത്തിയ ‘ഫാമിലി ചെയിൻ’ പ്രതിഷേധത്തിൽ ആയിരങ്ങൾ പങ്കാളികളായി.
ദ്വീപ് നിവാസികൾക്ക് ഐക്യദാർഢ്യം പ്രഖ്യാപിച്ചും ദ്വീപിന്റെ മൂല്യവത്തായ പൈതൃക പാരമ്പര്യം തച്ചുടക്കരുതെന്നും ആവശ്യപ്പെട്ടാണ് ‘ഫാമിലി ചെയിൻ’ സംഘടിപ്പിച്ചത്. കോവിഡ് പ്രോട്ടോകോൾ പാലിച്ചുകൊണ്ട് വിവിധ പ്രതിഷേധ സമരങ്ങളും ലക്ഷദ്വീപ് ദിനാചരണ ഭാഗമായി നടന്നു. മഞ്ചേരി ഡിവിഷണൽ പോസ്റ്റൽ സൂപ്രണ്ടിന്റെ ഓഫീസിനുമുന്നിൽ സംസ്ഥാന, ജില്ലാ ഭാരവാഹികളുടെ നേതൃത്വത്തിൽ ‘സ്റ്റേ വിത്ത് ലക്ഷദ്വീപ്’ എന്ന മുദ്രാവാക്യമുയർത്തി നിൽപ്പ് സമരം നടത്തി.
വിഷയത്തിൽ രാഷ്ട്രപതിയുടെ ഇടപെടൽ ആവശ്യപ്പെട്ട് നിവേദനമയച്ചു. അയക്കാനുള്ള നിവേദനം മഞ്ചേരി ഡിവിഷണൽ പോസ്റ്റൽ സൂപ്രണ്ട് സുഭാഷിന് സംസ്ഥാന ജനറൽ സെക്രട്ടറി സയ്യിദ് മുഹമ്മദ് കോയ തങ്ങൾ ജമലുല്ലൈലി കൈമാറി.
മലപ്പുറം ഈസ്റ്റ് ജില്ലാ പ്രസിഡണ്ട് പാണക്കാട് സയ്യിദ് അബ്ബാസലി ശിഹാബ് തങ്ങൾ, സുന്നി യുവജന സംഘം സംസ്ഥാന സെക്രട്ടറി അബ്ദുസമദ് പൂക്കോട്ടൂർ, മലപ്പുറം വെസ്റ്റ് ജില്ലാ ജനറൽ സെക്രട്ടറി സയ്യിദ് കെകെഎസ് തങ്ങൾ വെട്ടിച്ചിറ, ഈസ്റ്റ് ജില്ലാ ജനറൽ സെക്രട്ടറി സലീം എടക്കര, ജില്ലാ സെക്രട്ടറിമാരായ ഹസൻ സഖാഫി പൂക്കോട്ടൂർ, അബ്ദുൽ മജീദ് ദാരിമി വളരാട് എന്നിവരും സയ്യിദ് സാബിഖലി ശിഹാബ് തങ്ങൾ, സി ടി ജലീൽ മാസ്റ്റർ പട്ടർകുളം, പാലക്കൻ ബശീർ എന്നിവരും പങ്കെടുത്തു.
ദിനാചരണത്തിൻ്റെ ഭാഗമായി ജില്ലയിലെ ആയിരക്കണക്കിന് സംഘടനാ അനുഭാവികളുടെ വീടുകളിൽ ‘ഫാമിലി ചെയിൻ’ തീർത്തു. അഡ്മിനിസ്ട്രേറ്ററെ തിരിച്ചു വിളിക്കണം എന്നാവശ്യപ്പെട്ട് രാഷ്ട്രപതിക്ക് പ്രവർത്തകർ ഇ-മെയിൽ അയക്കുകയും ചെയ്തു. വിവിധയിടങ്ങളിൽ നടന്ന ഫാമിലി ചെയിനിൽ സമസ്ത കേന്ദ്ര മുശാവറ അംഗം കോട്ടുമല മൊയിതീൻകുട്ടി മുസ്ലിയാർ, സമസ്ത മലപ്പുറം ജില്ല ജനറൽ സെക്രട്ടറി പുത്തനഴി മൊയിതീൻ ഫൈസി തുടങ്ങിയ നിരവധി സംസ്ഥാന-ജില്ലാ-പ്രാദേശിക നേതാക്കൾ പങ്കാളികളായി.
Most Read: ‘അവരുടെ പിതാക്കൻമാർക്ക് പോലും എന്നെ അറസ്റ്റ് ചെയ്യാനാകില്ല’; വെല്ലുവിളിയുമായി രാംദേവ്