പാലക്കാട്: പട്ടാമ്പിയിൽ കുളത്തിൽ കുളിക്കാനിറങ്ങിയ രണ്ടു വിദ്യാർഥികൾ മുങ്ങിമരിച്ചു. പട്ടാമ്പി കൊടലൂർ മാങ്കോട്ടിൽ സുധീഷിന്റെ മകൻ അശ്വിൻ (12), കുറ്റിപ്പുറം പേരശന്നൂർ പന്നിക്കോട്ടിൽ സുനിൽ കുമാറിന്റെ മകൻ അഭിജിത് (13) എന്നിവരാണ് മരിച്ചത്. ഇരുവരും വള്ളൂരിലെ ക്വാട്ടേഴ്സിൽ താമസിക്കുന്ന കുടുംബത്തിലെ കുട്ടികളാണ്.
ഇന്ന് ഉച്ചക്ക് വള്ളൂർ മേലേകുളത്തിലായിരുന്നു അപകടം. കുളത്തിൽ ഇരുവരും കൂട്ടുകാരുമൊത്ത് കുളത്തിൽ കുളിക്കാനും മീൻ പിടിക്കാനും എത്തിയതാണ്. കുളിക്കുന്നതിനിടെ ഇരുവരും മുങ്ങിപ്പോവുകയായിരുന്നു. സുഹൃത്തുക്കൾ രക്ഷിക്കാൻ ശ്രമിച്ചെങ്കിലും ഇവരെ പുറത്തെടുക്കാനായില്ല.
പിന്നാലെ ബഹളം കേട്ടെത്തിയ നാട്ടുകാരാണ് ഇവരെ പുറത്തെടുത്ത ആശുപത്രിയിൽ എത്തിച്ചത്. അപ്പോഴേക്കും മരണം സംഭവിച്ചിരുന്നു. പട്ടാമ്പി സെന്റ് പോൾസ് ഹൈസ്കൂളിലെ ഏഴാം ക്ളാസ് വിദ്യാർഥിയാണ് അശ്വിൻ. അഭിജിത്ത് പട്ടാമ്പി ഗവ. ഹൈസ്കൂളിലെ എട്ടാം ക്ളാസ് വിദ്യാർഥിയും.
Most Read: കൊച്ചിയിലെ രാസലഹരിവേട്ട; പാകിസ്ഥാനിലെ ഹാജി സലിം ലഹരിമാഫിയ സംഘത്തിന്റേത്