തിരുവനന്തപുരം: ചന്തവിളയിൽ ഗുണ്ടകളുമായി എത്തിയ യുവാവ് ഭാര്യയുടെ വീടും ബന്ധുവീടും അടിച്ചുതകർത്തു. മോഷണമടക്കം നിരവധി കേസുകളിൽ പ്രതിയായ റഹീസ് ഖാൻ ആണ് ഭാര്യ നൗഫിയയുടെ ചന്തവിളയിലെ വീട് അടിച്ചുതകർത്തത്. ശനിയാഴ്ച പുലർച്ചെ ഒരു മണിയോടെയായിരുന്നു സംഭവം.
രണ്ടുദിവസം മുൻപുണ്ടായ അടിപിടിയുമായി ബന്ധപ്പെട്ട് ഭാര്യാപിതാവ് റഹീസിനെതിരെ സ്റ്റേഷനിൽ പരാതി നൽകിയതാണ് ആക്രമണത്തിന് കാരണം. സ്ഥിരമായി മദ്യപിച്ച് വീട്ടിൽ പ്രശ്നമുണ്ടാക്കുന്ന ഇയാൾ കഴിഞ്ഞ ദിവസം വാളുമായി എത്തി ഭാര്യയെ കൊല്ലുമെന്ന് ഭീഷണിപ്പെടുത്തിയിരുന്നു. റഹീസിനെ ഭയന്ന് ഭാര്യ നൗഫിയ പിതാവിനൊപ്പം മറ്റൊരു സ്ഥലത്തേക്ക് മാറിയിരുന്നു.
കഴിഞ്ഞ ദിവസം ഭാര്യയുടെ വീട്ടിൽ എത്തിയ ഇയാൾ ഭാര്യയെ കാണാത്തതിനെ തുടർന്ന് വീട് അടിച്ചുതകർക്കുകയായിരുന്നു. മാരകായുധങ്ങളുമായി രണ്ട് ഗുണ്ടകൾക്കൊപ്പമാണ് റഹീസ് എത്തിയത്. വീട്ടിലെ ജനലുകളും വാതിലുകളും ടിവി അടക്കമുള്ള ഉപകരണങ്ങളും ശൗചാലയവും പൂർണമായും നശിപ്പിച്ചു. തുടർന്ന് ഈ സംഘം കണിയാപുരം മുസ്ലിം സ്കൂളിന് സമീപം താമസിക്കുന്ന നൗഫിയയുടെ ബന്ധുവായ സക്കീറിന്റെ വീടും വാഹനവും അടിച്ചുതകർത്തു. സംഭവത്തിന് ശേഷം റഹീസ് ഖാൻ അടക്കമുള്ള പ്രതികൾ ഒളിവിൽ പോയിരിക്കുകയാണ്. ഇവർക്കായി തിരച്ചിൽ തുടങ്ങിയിട്ടുണ്ടെന്ന് പോത്തൻകോട് പോലീസ് പറഞ്ഞു.
Most Read: തട്ടിപ്പ് കേസ്; ജാക്വിലിന് ഫെര്ണാണ്ടസിന്റെ സ്വത്തുക്കൾ കണ്ടുകെട്ടി