ഹാങ്ചൗ: പങ്കെടുത്ത ആദ്യ ഏഷ്യന് ഗെയിംസില് തന്നെ സ്വര്ണമണിഞ്ഞാണ് ഇന്ത്യന് വനിതകള് ചരിത്രമെഴുതിയത്. മെഡല് പോരാട്ടത്തില് ശ്രീലങ്കയെ 19 റണ്സിന് തകര്ത്താണ് ഇന്ത്യയുടെ സ്വര്ണനേട്ടം. ഇന്ത്യ ഉയര്ത്തിയ 117 റണ്സ് വിജയലക്ഷ്യം പിന്തുടര്ന്ന ലങ്കക്ക് 20 ഓവറില് എട്ട് വിക്കറ്റ് നഷ്ടത്തിൽ 97 റണ്സെടുത്ത് മുട്ടുമടക്കി.
സ്കോര്; ഇന്ത്യ 20 ഓവറില് 116–7, ശ്രീലങ്ക 20 ഓവറില് 97–8. ഏഷ്യന് ഗെയിംസ് വനിതാ ക്രിക്കറ്റില് ഇന്ത്യയുടെ ആദ്യ സ്വര്ണനേട്ടമാണിത്. ഇന്ത്യ ഉയര്ത്തിയ ചെറിയ വിജയലക്ഷ്യത്തിലേക്ക് തുടക്കത്തില് തകര്ത്തടിച്ചാണ് ലങ്ക തുടങ്ങിയത്. ദീപ്തി ശര്മയുടെ ആദ്യ ഓവറില് തന്നെ ലങ്ക 12 റണ്സടിച്ച് ഞെട്ടിച്ചെങ്കിലും രണ്ടാം ഓവറില് ഒരു റണ് മാത്രം വിട്ടുകൊടുത്ത പൂജ വസ്ട്രാക്കർ ഇന്ത്യയെ മൽസരത്തിലേക്ക് തിരികെ കൊണ്ടുവന്നു.
പത്തൊന്പതാം ഏഷ്യന് ഗെയിംസിലെ രണ്ടാം സ്വര്ണമാണ് ഇതോടെ ഇന്ത്യ സ്വന്തമാക്കിയത്. 14 റണ്സെടുക്കുന്നതിനിടെ മൂന്ന് വിക്കറ്റുകള് ലങ്കക്ക് നഷ്ടമായി. ചമാരി അത്തപത്തു (12), അനുഷ്ക സഞ്ജീവനി (1), വിശ്മി ഗുണരത്നെ (0) എന്നിവരാണ് പുറത്തായത്. ഈ മൂന്ന് വിക്കറ്റുകളുമെടുത്ത് ടിതാസ് സധുവാണ് ഇന്ത്യയ്ക്ക് മികച്ച തുടക്കം സമ്മാനിച്ചത്. എന്നാല് ഹസിനി പെരേരയും നിളാകാശി ഡി സില്വയും ചേര്ന്ന് ശ്രീലങ്കയെ കരകയറ്റി. ടീം സ്കോര് 50ല് നില്ക്കേ 25 റണ്സെടുത്ത ഹസിനി പെരേരയെ പുറത്താക്കി രാജേശ്വരി ഗയക്വാദ് ലങ്കയെ വീണ്ടും പ്രതിരോധത്തിലാക്കി.
നിളകാശി ഡി സില്വ(23), ഒഷാധി രണസിങ്കെ(19) എന്നിവര് ലങ്കന് സ്കോര്ബോര്ഡിലേക്ക് കാര്യമായ സംഭാവനകള് നല്കി. എന്നാല് പിന്നാലെ വന്നവരെ പിടിച്ചുകെട്ടിയ ഇന്ത്യന് ബൗളര്മാര് വിജയം തട്ടിയെടുത്തു. ഒടുവില് ലങ്കന് ഇന്നിങ്സ് എട്ട് വിക്കറ്റ് നഷ്ടത്തിൽ 97 റണ്സിന് അവസാനിച്ചു. 19 റണ്സ് ജയത്തോടെയാണ് അവസാനം ഇന്ത്യ സ്വര്ണമണിഞ്ഞത്.
നേരത്തേ ടോസ് നേടി ബാറ്റിങ്ങിനിറങ്ങിയ ഇന്ത്യന് വനിതാ ടീമിന് തുടക്കത്തില് തന്നെ തിരിച്ചടിയേറ്റു. ടീം സ്കോര് 16ല് നില്ക്കേ ഓപ്പണര് ഷഫാലി വര്മയെ ഇഇന്ത്യയ്ക്ക് നഷ്ടപ്പെട്ടിരുന്നു. 15 പന്തില് നിന്ന് ഒമ്പത് റണ്സെടുത്താണ് താരം മടങ്ങിയത്. എന്നാല് പിന്നീടിറങ്ങിയ ജെമീമ റോഡ്രിഗസുമൊത്ത് സ്മൃതി മന്ദാന സ്കോറുയര്ത്തി. കരുതലോടെ ബാറ്റേന്തിയ ഇരുവരും ഒമ്പതാം ഓവറില് ടീം സ്കോര് 50 കടത്തി.
ടീം സ്കോര് 89ല് നില്ക്കേ സ്മൃതി മന്ദാനയുടെ വിക്കറ്റ് വീഴ്ത്തി. 45 പന്തില് ഒരു സിക്സറിന്റേയും നാല് ഫോറുകളുടേയും അകമ്പടിയോടെ 46 റണ്സെടുത്ത താരത്തെ റാണവീരയാണ് പുറത്താക്കിയത്. പിന്നീടിറങ്ങിയ റിച്ച ഘോഷ് (9), ഹര്മന്പ്രീത് കൗര് (2), പൂജ വസ്ട്രാക്കർ (2) എന്നിവര്ക്ക് കാര്യമായ സംഭാവന നല്കാനായില്ല. 42 റണ്സെടുത്ത ജെമീമ റോഡ്രിഗസ് തിളങ്ങുന്ന പ്രകടനമാണ് കാഴ്ചവെച്ചത്.
MOST READ | സാമൂഹിക മാദ്ധ്യമങ്ങളിൽ പ്രായപരിധി നിശ്ചയിക്കണമെന്ന് ഹൈക്കോടതി