കോഴിക്കോട്: ആഘോഷങ്ങളും ആർഭാടങ്ങളും ഇല്ലാതെ ഒരു നേരത്തെ ഭക്ഷണത്തിനായി മറ്റുള്ളവരുടെ ദയ കാത്ത് കഴിയുന്ന വഴിയോരത്തെ മനുഷ്യർക്കൊപ്പം ക്രിസ്‌മസ്‌-പുതുവൽസരാഘോഷം നടത്തി തെരുവിലെ മക്കൾ ചാരിറ്റി (ടിഎംസി). ജില്ലയിലെ തെരുവോരങ്ങളിൽ കഴിയുന്ന ആളുകൾക്ക് ഭക്ഷണവും വസ്‌ത്രവും വിതരണം ചെയ്‌താണ്‌ ടിഎംസി ക്രിസ്‌മസ്‌-പുതുവൽസരം ആഘോഷിച്ചത്. സിഎസ്‌ഐ സഭയുടെ കരോൾ പ്രോഗ്രാം വഴി സമാഹരിച്ച തുക കൊണ്ടാണ് അന്നദാനവും വസ്‌ത്ര വിതരണവും നടത്തിയത്.
ടിഎംസിയും ശോഭിക വെഡ്‌ഡിങ് സെന്ററും സംയുക്‌തമായി നടത്തിയ അന്നദാനം നിരവധി പേരുടെ വയറും മനസും നിറച്ചു. പാളയത്തെ സൗജന്യ ഫുഡ് കൗണ്ടർ വഴിയാണ് ആളുകൾക്ക് ഭക്ഷണം വിതരണം ചെയ്‌തത്‌. ശോഭിക വെഡിങ് സെന്ററാണ് ഇവർക്കായുള്ള വസ്‌ത്രങ്ങൾ സ്‌പോൺസർ ചെയ്‌തത്‌. കോഴിക്കോടിന്റെ തെരുവുവീഥികളിൽ കാൽ നൂറ്റാണ്ടുകൾക്ക് മുമ്പ് ടിഎംസി ആരംഭിച്ച അന്നദാന-ക്ഷേമപ്രവർത്തനങ്ങൾ ഇന്നും മുടക്കമില്ലാതെ നിരവധി പേരുടെ കണ്ണീരൊപ്പുന്നു.
എടവക വികാരി റവ. ഡോ. ടിഐ ജയിംസ്, സെക്രട്ടറി മെജോ മാത്യു, സജ്‌ന ഹെൽദാസ്, റെനി മെജോ, മാത്യു, ഡാൻ ജോൺ, സൈമൺ നടുവട്ടം, ശോഭിക അക്കൗണ്ട്സ് മാനേജർ നൗഷാദ്, ടിഎംസി ജലീൽ മാത്തോട്ടം, സ്‌നേഹരാജ്, ഫൈസൽ മക്കാട്ട്, ടിഎംസിയുടെ ഫൗണ്ടർ ചെയർമാൻ സലീം വട്ടക്കിണർ എന്നിവർ പരിപാടികൾക്ക് നേതൃത്വം നൽകി.
Most Read: കെപിസിസിയിൽ അച്ചടക്ക സമിതി; അധ്യക്ഷനായി തിരുവഞ്ചൂർ
