ന്യൂഡെൽഹി: മോൻസൺ മാവുങ്കൽ പ്രതിയായ പുരാവസ്തു തട്ടിപ്പു കേസിൽ കേരള പോലീസിന്റെയും വിജിലൻസിന്റെയും കുരുക്കുകളിൽപ്പെട്ട കെ സുധാകരന് പിന്തുണയുമായി രാഹുൽ ഗാന്ധി. ഭീഷണിയുടെയും പകപോക്കലിന്റെയും രാഷ്ട്രീയത്തെ കോൺഗ്രസ് പാർട്ടി ഭയപ്പെടുന്നില്ലായെന്ന് രാഹുൽ ഗാന്ധി വ്യക്തമാക്കി. കെ സുധാകരന്റെയും പ്രതിപക്ഷ നേതാവ് വിഡി സതീശന്റെയും കൈകൾ കോർത്ത് പിടിച്ചുള്ള ചിത്രത്തിനൊപ്പം ട്വിറ്ററിലാണ് രാഹുൽ പ്രതികരണം നടത്തിയത്.
കേരളത്തിന്റ ചുമതല വഹിക്കുന്ന എഐസിസി ജനറൽ സെക്രട്ടറി താരിഖ് അൻവറും ഒപ്പമുണ്ടായിരുന്നു. നേതാക്കൾ രാഹുലുമായി കൂടിക്കാഴ്ച നടത്തി. സംസ്ഥാനത്തെ രാഷ്ട്രീയ സ്ഥിതിഗതികൾ വിശദീകരിച്ചു. പുരാവസ്തു തട്ടിപ്പ് കേസിൽ അറസ്റ്റിലായത് ഉൾപ്പടെ കെ സുധാകരൻ രാഹുലിനെ ധരിപ്പിച്ചു. സംസ്ഥാനത്ത് നേതൃമാറ്റം ഇല്ലെന്ന് ചർച്ചകൾക്ക് ശേഷം താരിഖ് അൻവറും വ്യക്തമാക്കി.
സുധാകരനെതിരായ കേസ് രാഷ്ട്രീയ പ്രേരിതമാണെന്ന നിലപാടിലാണ് കോൺഗ്രസ്. ഇക്കാര്യത്തിൽ സുധാകരന് പൂർണ പിന്തുണ നൽകാനാണ് രാഹുലും പാർട്ടി നേതാക്കളോട് ആവശ്യപ്പെട്ടിരിക്കുന്നത്. രാഷ്ട്രീയ സാഹചര്യങ്ങൾ വിശദീകരിച്ചതിനൊപ്പം സംഘടനാ തിരഞ്ഞെടുപ്പും ഗ്രൂപ്പ് തർക്കവും രാഹുലുമായുള്ള കൂടിക്കാഴ്ചയിൽ ചർച്ചയായതായാണ് വിവരം.
Most Read: ‘വിചാരണത്തടവ് അനന്തമായി നീളുന്നത് നീതി നിഷേധം’; മഅദ്നി കേരളത്തിലേക്ക്