തിരുവനന്തപുരം: തിരഞ്ഞെടുപ്പ് ഫലം ചർച്ച ചെയ്യാൻ എകെജി സെന്ററിൽ ചേർന്ന ഇടതുമുന്നണി യോഗത്തിനിടെ വിജയാഘോഷം നടത്തി എൽഡിഎഫ് നേതാക്കൾ. ചടങ്ങിൽ മുഖ്യമന്ത്രി പിണറായി വിജയൻ കേക്ക് മുറിച്ച് മധുരം പങ്കുവെച്ചു. നേതാക്കൾക്കെല്ലാവർക്കും മധുരം വിതരണം ചെയ്തതിന് ശേഷമാണ് യോഗം ആരംഭിച്ചത്. തദ്ദേശ തിരഞ്ഞെടുപ്പിൽ നേടിയ മിന്നുന്ന ജയത്തിന്റെ പശ്ചാത്തലത്തിൽ തികച്ചും ആഹ്ളാദകരമായ അന്തരീക്ഷത്തിലാണ് യോഗം ചേർന്നത്.
നിയമസഭാ തിരഞ്ഞെടുപ്പിലും മികച്ച വിജയം നേടാനാകുമെന്ന പ്രതീക്ഷയിലാണ് മുന്നണി. കോടിയേരി ബാലകൃഷ്ണൻ, സിപിഐ സംസ്ഥാന സെക്രട്ടറി കാനം രാജേന്ദ്രൻ, സിപിഐ നേതാവ് പന്ന്യൻ രവീന്ദ്രൻ, കേരള കോൺഗ്രസ് (എം) ചെയർമാൻ ജോസ് കെ മാണി, കോൺഗ്രസ് (ബി) എംഎൽഎ ഗണേഷ് കുമാർ, കോൺഗ്രസ് (എസ്) നേതാവ് കടന്നപ്പള്ളി രാമചന്ദ്രൻ തുടങ്ങിയവർ യോഗത്തിൽ പങ്കെടുത്തു.
Also Read: തുടർ ഭരണത്തിന് സാധ്യത; പ്രതീക്ഷയോടെ സിപിഎം
ആരോപണങ്ങളുടെ കൊടുങ്കാറ്റിനിടയിലും ഇടതുപക്ഷ ജനാധിപത്യ മുന്നണി അഭിമാന നേട്ടം കൈവരിച്ചത് സൗജന്യ ഭക്ഷ്യ കിറ്റും മാസം തോറുമുള്ള ക്ഷേമ പെൻഷൻ വിതരണം അടക്കമുള്ള പദ്ധതികൾ കാരണമാണെന്ന് സിപിഎം സംസ്ഥാന സെക്രട്ടറിയേറ്റ് വിലയിരുത്തി. കേന്ദ്ര ഏജൻസികളുടെ അന്വേഷണം രാഷ്ട്രീയ പ്രേരിതം ആണെന്ന് ജനങ്ങളെ ബോധ്യപ്പെടുത്താനായെന്നും സിപിഎം യോഗം വിലയിരുത്തി.