ബാഴ്‌സലോണ: കരിയറിന്റെ വലിയൊരു ഭാഗവും തന്റെ സഹതാരമായിരുന്ന ലൂയിസ് സുവാരസിന് അര്‍ഹിച്ച യാത്രയയപ്പ് നല്‍കാത്തത്തില്‍ മാനേജ്‌മെന്റിനെ വിമര്‍ശിച്ച് ലയണല്‍ മെസ്സി. സുവരസിനൊപ്പമുള്ള നിമിഷങ്ങള്‍ പങ്കുവെച്ച മെസ്സി ക്ലബ്ബിന്റെ എക്കാലത്തെയും വലിയ ഗോള്‍ വേട്ടക്കാരില്‍ ഒരാളായ സുവാരസിനെ മാനേജ്‌മെന്റ് ചവുട്ടി പുറത്താക്കുകയാണ് ചെയ്‌തതെന്ന് പറയുന്നു.
പുതിയ പരിശീലകന്‍ കോമാന് കീഴില്‍ സുവാരസിന്റെ സ്ഥാനം തുലാസിലായതിന് പിന്നാലെയാണ് താരം ടീം വിടാനുള്ള ശ്രമങ്ങള്‍ ആരംഭിച്ചത്. തുടക്കത്തില്‍ റൊണാള്‍ഡോയുടെ ജുവന്റസിലേക്ക് ചേക്കേറാനുള്ള ശ്രമം നടത്തിയെങ്കിലും പിന്നീട് അത് ഉപേക്ഷിക്കുകയായിരുന്നു. ലാലിഗയിലെ മുന്‍ നിര ടീമുകളില്‍ ഒന്നായ അത്‌ലറ്റിക്കോ മാഡ്രിഡിലേക്കാണ് സുവാരസ് കൂടുമാറുന്നത്.
