കൊച്ചി: കേരളത്തിലെ പ്രമുഖ സ്പൈസസ്-കറി പൗഡർ ബ്രാൻഡായ ഈസ്റ്റേണിനെ ഏറ്റെടുക്കാൻ ഒരുങ്ങി നോർവീജിയൻ കമ്പനിയായ ഓർക്ക് ല ഫുഡ്സ്. ഓർക്ക് ലയുടെ ഇന്ത്യയിലെ ഉപകമ്പനിയായ എംടിആർ ഫുഡ് പ്രൊഡക്ടസ് ആണ് ഏറ്റെടുക്കലിന് പിന്നിൽ. ആകെ 2000 കോടി വിലയുള്ള ഓഹരികളിൽ 74 ശതമാനവും കമ്പനിയുടെ തലപ്പത്തുള്ള നവാസ് മീരാൻ, ഫിറോസ് മീരാൻ എന്നിവരുടെ കൈവശമായിരുന്നു. ബാക്കിയുള്ള 26 ശതമാനം ഓഹരി അമേരിക്കൻ കമ്പനിയായ മക്കോർമികിന്റെ ഉടമസ്ഥതയിലായിരുന്നു.
836 കോടി രൂപ മൂല്യമുള്ള 41.8 ശതമാനം ഓഹരികൾ മീരാൻ സഹോദരന്മാരിൽ നിന്നും 520 കോടി വരുന്ന 26 ശതമാനം മക്കോർമികിന്റെ കൈയിൽ നിന്നും എംടിആർ വാങ്ങും. ഇതിന് ശേഷം എംടിആർ-ഈസ്റ്റേൺ എന്നിവ ഒരു കമ്പനിയായി മാറും.
രാജ്യത്ത് നിലവിലുള്ളതിന്റെ ഇരട്ടി വിൽപ്പനയെന്ന നേട്ടമാണ് ഓർക്ക് ല ലക്ഷ്യമിടുന്നത്. ഓഹരി കൈമാറ്റ പ്രക്രിയ അവസാനിക്കുന്നതോടെ നിലവിൽ വരുന്ന ഈസ്റ്റേൺ-ഓർക്ക് ല സംയുക്ത കമ്പനിയിൽ 9.99 ശതമാനം മാത്രമായിരിക്കും മീരാൻ സഹോദരന്മാരുടെ വിഹിതം.