ആലപ്പുഴ: കോൺഗ്രസിൽ തർക്കം രൂക്ഷമാകുന്നതിനിടെ ഇടഞ്ഞുനിൽക്കുന്ന നേതാക്കളുമായി അനുനയ ചർച്ചകൾ നടത്തി പ്രതിപക്ഷ നേതാവ് വിഡി സതീശൻ. രമേശ് ചെന്നിത്തലയുമായി ഹരിപ്പാടുള്ള അദ്ദേഹത്തിന്റെ വസതിയിലെത്തി സതീശൻ കൂടിക്കാഴ്‌ച നടത്തി.
കോൺഗ്രസിലെ പ്രശ്‍നങ്ങൾ പരിഹരിക്കാനാകുമെന്ന ആത്‌മവിശ്വാസമുണ്ടെന്ന് സന്ദർശനത്തിന് ശേഷം വിഡി സതീശൻ പ്രതികരിച്ചു. നേതാക്കളുമായി തുടർച്ചയായി ചർച്ചകൾ നടത്തും. ഉമ്മൻചാണ്ടിയും രമേശ് ചെന്നിത്തലയും നേതൃത്വത്തെ വഴിനടത്തേണ്ടവരാണെന്ന് പ്രതിപക്ഷ നേതാവ് പറയുന്നു. പ്രശ്‌നം തീർക്കുന്നതിൽ സതീശനും ചെന്നിത്തലയും പരസ്‌പരം വാഗ്‌ദാനം ചെയ്യുകയും ചെയ്‌തു.
സമന്വയത്തിന്റെ രീതിയിലേ പോകൂ എന്നതാണ് സമീപനമെന്നും വിഡി സതീശൻ കൂട്ടിച്ചേർത്തു. അതേസമയം, സംസ്‌ഥാന നേതൃത്വം നടത്തുന്ന ചർച്ചകളുമായി സഹകരിക്കുമെന്ന് ചെന്നിത്തല പ്രതികരിച്ചു. വിഡി സതീശന്റെ ശ്രമങ്ങളെ സ്വാഗതം ചെയ്യുന്നുവെന്നും അദ്ദേഹം പറഞ്ഞു. കൂടിക്കാഴ്‌ചക്ക് ശേഷം മാദ്ധ്യമങ്ങളെ കാണുകയായിരുന്നു ഇരുവരും.
Also Read: മരിച്ച 12കാരന്റെ മാതാവിന് പനി; സമ്പർക്ക പട്ടിക വിപുലപ്പെടാൻ സാധ്യത
