ന്യൂഡെൽഹി: വനിതാ സംവരണ ബിൽ നടപ്പിലാക്കാൻ ദൈവം തന്നെ തിരഞ്ഞെടുത്തെന്ന് പ്രധാനമന്ത്രി നരേന്ദ്രമോദി. രാജ്യത്തെ അമ്മമാർക്കും സഹോദരിമാർക്കും പെൺമക്കൾക്കും ആദരം. ജനാധിപത്യം കൂടുതൽ കരുത്താർജിക്കും. ബിൽ ഏകകണ്‌ഠമായി പാസാക്കണമെന്നും പ്രധാനമന്ത്രി ആവശ്യപ്പെട്ടു.
ഏറെക്കാലം രാജ്യം കാത്തിരിക്കുന്ന വനിതാ സംവരണ ബിൽ ലോക്‌സഭയിൽ അവതരിപ്പിച്ചു. ബിൽ അവതരണത്തിന് മുൻപ്, പാർലമെന്റിന്റെ പ്രത്യേക സെഷനിൽ സംസാരിച്ച പ്രധാനമന്ത്രി, സമ്മേളനം രാജ്യത്തിന്റെ ചരിത്രത്തിൽ ഇടംപിടിക്കുമെന്നും പറഞ്ഞു.
വനിതാ സംവരണ ബില്ലിനെ കുറിച്ചുള്ള ചർച്ച ഏറെക്കാലമായി നടക്കുന്നു. അടൽ ബിഹാരി വാജ്പേയിയുടെ ഭരണകാലത്ത് വനിതാ സംവരണ ബിൽ പലതവണ അവതരിപ്പിച്ചെങ്കിലും ബിൽ പാസാക്കാനുള്ള ഭൂരിപക്ഷം ഇല്ലായിരുന്നു. ഇതുമൂലം ഈ സ്വപ്‌നം അപൂർണമായി തുടർന്നു. ഇന്ന് ഇത് മുന്നോട്ട് കൊണ്ടുപോകാൻ ദൈവം എനിക്ക് അവസരം നൽകി. ഇരു സഭകളിലും സ്‌ത്രീകളുടെ പങ്കാളിത്തം സംബന്ധിച്ച് നമ്മുടെ സർക്കാർ ഇന്ന് ഒരു പുതിയ ബിൽ കൊണ്ടുവരുന്നു- പ്രധാനമന്ത്രി ലോക്‌സഭയിൽ പറഞ്ഞു.
വനിതാ സംവരണം പുതിയ പാർലമെന്റിലെ ആദ്യ ബില്ലായി കേന്ദ്ര നിയമമന്ത്രി അർജുൻ റാം മേഘ്‌വാൾ അവതരിപ്പിച്ചത്. ലോക്‌സഭയിലും നിയമസഭയിലും 33 ശതമാനം സീറ്റ് വനിതകൾക്കായി സംവരണം ചെയ്യുന്നതാണ് ബിൽ. രാജ്യസഭ പാസാക്കിയ ബിൽ നിലവിലുണ്ടെന്ന് പറഞ്ഞു പുതിയ ബില്ലിൽ സാങ്കേതിക തടസം ഉന്നയിച്ചു പ്രതിപക്ഷം സഭയിൽ ബഹളമുണ്ടാക്കി.
Most Read| മാദ്ധ്യമ പ്രവർത്തകയോട് മോശം പെരുമാറ്റം; നടൻ അലൻസിയറിന് എതിരെ കേസെടുത്ത് വനിതാ കമ്മീഷൻ
