പടന്ന: കോവിഡ് മാനദണ്ഡങ്ങൾ പാലിക്കാതെ അനാവശ്യമായി പുറത്തിറങ്ങുന്നവർക്ക് മുന്നറിയിപ്പുമായി പടന്ന ഗ്രാമ പഞ്ചായത്തിൽ കാലനിറങ്ങി. പടന്നയിലെ മാഷ് പദ്ധതി പ്രവർത്തകരാണ് കോവിഡ് രണ്ടാം തരംഗത്തിൽ പാലിക്കേണ്ട നിർദ്ദേശങ്ങളെ കുറിച്ച് ജനങ്ങളെ ബോധവൽകരിക്കാൻ നഗരത്തിലിറങ്ങിയത്.
കാലന്റെ വേഷമണിഞ്ഞാണ് പ്രവർത്തകരിൽ ഒരാൾ നഗരത്തിലിറങ്ങിയത്. ഓരിമുക്കിൽനിന്ന് തുടങ്ങിയ യാത്ര കടകളിലും പൊതു ഇടങ്ങളിലും മുഖാവരണവും കൈയുറയും അണിയുന്നതിന്റെയും കൈകളുടെ ശുചിത്വം പാലിക്കേണ്ടുന്നതിന്റെയും പ്രാധാന്യം ബോധ്യപ്പെടുത്തി. പടന്ന മൂസഹാജിമുക്കിലാണ് പ്രചാരണം അവസാനിപ്പിച്ചത്.
പുത്തിഗെ എഎൽപി സ്കൂൾ അധ്യാപകനും നാടക പ്രവർത്തകനുമായ രാഹുൽ ഉദിനൂരാണ് കാലനായി വേഷമിട്ടത്. കൂടാതെ, ലഘുലേഖകളും വിതരണം ചെയ്തു. സെക്ടറൽ മജിസ്ട്രേട്ട് ടി ബ്രിജേഷ് കുമാർ, മാഷ് പദ്ധതി അംഗങ്ങളായ എ ബാബുരാജ്, എം പ്രദീപ്, പിവി മനോജ് കുമാർ, വി മനോജ്, കെപി രഞ്ജിത് തുടങ്ങിയവർ നേതൃത്വം നൽകി.
Also Read: കോവിഷീൽഡിനായി 3 മാസത്തെ കാത്തിരിപ്പ്; സ്വകാര്യ ആശുപത്രികൾക്കും പ്രതിസന്ധി