ഇടുക്കി: അരിക്കൊമ്പൻ ദൗത്യം വിജയം. മണിക്കൂറുകൾ നീണ്ട പരിശ്രമത്തിനൊടുവിലാണ് അരിക്കൊമ്പനെ ദൗത്യ സംഘം പിടികൂടിയത്. അഞ്ചു മയക്കുവെടി വെച്ചാണ് അരിക്കൊമ്പനെ കീഴടക്കിയത്. പ്രതികൂല കാലാവസ്‌ഥയും മറികടന്നായിരുന്നു ദൗത്യം. അരിക്കൊമ്പനെ പെരിയാർ വന്യജീവി സങ്കേതത്തിൽ തുറന്നുവിടും. ഒമ്പത് മണിയോടെ കൊമ്പനെ പെരിയാർ സങ്കേതത്തിൽ എത്തിക്കും.
തേക്കടി മംഗളാദേവി ക്ഷേത്രത്തിലേക്കുള്ള ഗേറ്റിലൂടെയാണ് അരിക്കൊമ്പനെ കൊണ്ടുപോകുന്നത്. കുമളി പഞ്ചായത്തിൽ നിരോധനാജ്‌ഞ പ്രഖ്യാപിച്ചിട്ടുണ്ട്. നാളെ രാവിലെ ഏഴ് വരെയാണ് നിരോധനാജ്‌ഞ. പഞ്ചായത്തിൽ വൈദ്യുതി ബന്ധം വിച്ഛേദിക്കുമെന്നും മുന്നറിയിപ്പുണ്ട്. ലോറിയിൽ കയറ്റിയ ശേഷം അരിക്കൊമ്പന് ജിപിഎസ് കോളർ ഘടിപ്പിച്ചിരുന്നു.
ദൗത്യത്തിനിടെ കനത്ത മഴയും കാറ്റും മൂടൽമഞ്ഞും വെല്ലുവിളി ഉയർത്തിയിരുന്നു. മഴ തുടർന്നാൽ അരിക്കൊമ്പൻ മയക്കം വിട്ടേക്കുമെന്നും ആശങ്കയുണ്ടായിരുന്നു. നാല് കുങ്കിയാനകൾ ചേർന്നാണ് അരിക്കൊമ്പനെ ലോറിയിലേക്ക് തള്ളിക്കയറ്റിയത്. ആദ്യം ലോറിയിലേക്ക് കയറാൻ അരിക്കൊമ്പൻ വഴങ്ങിയിരുന്നില്ല. മയക്കത്തിലും ആന ശൗര്യം കാട്ടിയിരുന്നു. ഡോ. അരുൺ സഖറിയയുടെ നേതൃത്വത്തിനുള്ള സംഘമാണ് മയക്കുവെടിവെച്ചത്.
Most Read: ബ്രിജ് ഭൂഷണെ സർക്കാർ സംരക്ഷിക്കുന്നത് എന്തിന്? ഗുസ്‌തി താരങ്ങൾക്ക് പിന്തുണയുമായി പ്രിയങ്ക ഗാന്ധി
