ദുബായ്: യുഎഇ മദേഴ്‌സ് എൻഡോവ്മെന്റ് ക്യാമ്പയിനിലേക്ക് ഒരു മില്യൺ ദിർഹം (2.25 കോടി രൂപ) സംഭാവന നൽകി മലയാളി വ്യവസായിയും ബുർജീൽ ഹോൾഡിങ്‌സ് സ്‌ഥാപകനും ചെയർമാനുമായ ഡോ. ഷംഷീർ വയലിൽ. ലോകത്തെങ്ങുമുള്ള ദശലക്ഷക്കണക്കിന് ആളുകൾക്ക് വിദ്യാഭ്യാസ സഹായം നൽകാനായി സ്‌ഥാപിച്ച ഒരു ബില്യൺ ദിർഹം ഫണ്ടിലേക്കാണ് സംഭാവന നൽകിയത്.
അമ്മമാർക്ക് ആദരവർപ്പിക്കാൻ യുഎഇ വൈസ് പ്രസിഡണ്ടും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്‌തൂം ആരംഭിച്ച പദ്ധതിയാണ് ‘മദേഴ്‌സ് എൻഡോവ്മെന്റ് ക്യാമ്പയിൻ’. സ്വന്തം അമ്മമാരോടുള്ള ആദര സൂചകമായി സംഭാവന നൽകാൻ ആഹ്വാനം ചെയ്യുന്ന പദ്ധതി, വിദ്യാഭ്യാസം നേടാൻ അവസരമില്ലാത്തവരെ പിന്തുണയ്‌ക്കാനും ശാക്‌തീകരിക്കാനുമാണ് ലക്ഷ്യമിടുന്നത്.
മാതാപിതാക്കളെ ബഹുമാനിക്കുന്ന മൂല്യങ്ങൾ, ദയ, അനുകമ്പ, ഐക്യദാർഢ്യം എന്നിവ പ്രോൽസാഹിപ്പിക്കുന്നതോടൊപ്പം മാനുഷിക ദൗത്യങ്ങളിലെ യുഎഇയുടെ പങ്ക് ഉയർത്തിക്കാട്ടുക കൂടിയാണ് മദേഴ്‌സ് എൻഡോവ്മെന്റ്. ആഗോളതലത്തിലെ മാനുഷികവും വികസനപരവുമായ സംരംഭങ്ങൾക്കുള്ള ഏറ്റവും വലിയ പ്രാദേശിക ഫൗണ്ടേഷനായ മുഹമ്മദ് ബിൻ റാഷിദ് അൽ മക്‌തൂം ഗ്ളോബൽ ഇനീഷ്യേറ്റീവിന് കീഴിലാണ് മദേഴ്‌സ് എൻഡോവ്മെന്റ് ക്യാമ്പയിൻ പ്രവർത്തിക്കുന്നത്.
ലോകത്തെ ദുരിതങ്ങൾ ലഘൂകരിച്ചുകൊണ്ട് ദയയിലും അനുകമ്പയിലും ഊന്നിയ യുഎഇയുടെ സന്ദേശം വ്യാപിപ്പിക്കുകയാണ് ഷെയ്ഖ് മുഹമ്മദ് മദേഴ്‌സ് എൻഡോവ്മെന്റ് ക്യാമ്പയിനിലൂടെ ചെയ്യുന്നതെന്ന് ഡോ. ഷംഷീർ വയലിൽ പറഞ്ഞു. മുഹമ്മദ് ബിൻ റാഷിദ് അൽ മക്‌തൂം ഗ്ളോബൽ ഇനീഷ്യേറ്റീവിന്റെ സാമൂഹിക പ്രതിബദ്ധതയ്‌ക്കും യുഎഇയുടെ സഹായ സന്നദ്ധതയ്‌ക്കും പിന്തുണ നൽകാനാണ് സംഭവനയെന്നും അദ്ദേഹം കൂട്ടിച്ചേർത്തു.
ഇതിനോടകം മികച്ച പ്രതികരണം ലഭിക്കുന്ന ക്യാമ്പയിനിലേക്ക് വ്യക്‌തികൾക്കും സ്‌ഥാപനങ്ങൾക്കും സംഭാവനകൾ നൽകാം. ഇതിനായി Mothersfund.ae സന്ദർശിച്ചോ പ്രത്യേക ടോൾ ഫ്രീ നമ്പറായ 800 9999ൽ ബന്ധപ്പെട്ടോ വിവരങ്ങൾ നേടാം. ഇത്തിസലാത്ത് ഉപയോക്‌താക്കൾക്ക് 1034, 1035, 1036, 1038 എന്നീ നമ്പറുകളിലേക്ക് ‘Mother’ എന്ന സന്ദേശം അയച്ചും സംഭാവനകൾ നൽകാനാകും.
Most Read| ഇത് ഇന്ത്യക്കാരി പശു; ബ്രസീലിൽ വിറ്റ വില കേട്ടാൽ ഞെട്ടും!
