കണ്ണൂര്: ജില്ലയിലെ നാല് കുടുംബാരോഗ്യ കേന്ദ്രങ്ങള്ക്ക് കൂടി ദേശീയ അംഗീകാരം. നാഷണല് ക്വാളിറ്റി അഷ്വറന്സ് സ്റ്റാന്ഡേര്ഡ് അംഗീകാരമാണ് ഇവക്ക് ലഭിച്ചത്. ഉദയഗിരി (94 ശതമാനം പോയിന്റ്), പുളിങ്ങോം(90), ചെറുകുന്ന് തറ(88), ആറളംഫാം(84) എന്നിവയാണ് ദേശീയ ഗുണനിലവാര അംഗീകാരമായ എന്ക്യുഎഎസ് ബഹുമതിക്ക് അര്ഹമായത്.
സെപ്റ്റംബര് മാസത്തില് ഇതിനായുള്ള പരിശോധനകള് എല്ലാം തന്നെ പൂര്ത്തിയതാണ്. കേരളത്തില് നിന്നും എട്ടു സ്ഥാപനങ്ങളാണ് പുതുതായി ദേശീയ അംഗീകാരം നേടിയത്. ഇതില് നാലും കണ്ണൂര് ജില്ലയില് നിന്നാണ്.
ആകെ 16 കുടുംബാരോഗ്യ കേന്ദ്രങ്ങളാണ് ഇതുവരെ ജില്ലയില് നിന്നും ബഹുമതി നേടിയത്. ഇതിനുപുറമെ കല്യാശേരി, മുണ്ടേരി, ചിറക്കല്, പട്ടുവം, ന്യൂമാഹി, പൊറോറ, എരമം-കുറ്റൂര്, മാട്ടൂല് കുടുംബാരോഗ്യ കേന്ദ്രങ്ങള് ദേശീയ അസസ്മെന്റിനായി കാത്തിരിക്കുകയാണ്. വൈകാതെ ഇവയുടെ പരിശോധനകളും പൂര്ത്തിയാവും.
ദേശീയ ആരോഗ്യ പരിപാടി, ജനറല് അഡ്മിനിസ്ട്രേഷന്, ഒപി ലാബ് എന്നീ വിഭാഗങ്ങളിലായി രോഗികള്ക്കുള്ള മികച്ച സേവനങ്ങള്, ഭൗതിക സാഹചര്യം, ജീവനക്കാരുടെ കാര്യക്ഷമത, മരുന്നുകളുടെ ലഭ്യതയും വിതരണവും, ക്ളിനിക്കല് സേവനങ്ങള്, രോഗീസൗഹൃദം, പകര്ച്ചവ്യാധി പ്രതിരോധ പ്രവര്ത്തനങ്ങള്, മാതൃ-ശിശു ആരോഗ്യം, ജീവിത ശൈലീരോഗ നിയന്ത്രണം, പ്രതിരോധ കുത്തിവയ്പ് സേവനങ്ങള് തുടങ്ങിയ വിഭാഗങ്ങളെ അടിസ്ഥാനമാക്കി 3500 പോയിന്റുകള് വിലയിരുത്തിയാണ് ദേശീയ ഗുണമേന്മ അംഗീകാരം നല്കുന്നത്.
Read Also: സ്വര്ണം കടത്തല് പാളി; പ്രതി കസ്റ്റംസ് ഉദ്യോഗസ്ഥരെ അക്രമിച്ച് രക്ഷപ്പെട്ടു